ന്യൂഡല്‍ഹി: ലോക്‌സഭ നിയമസഭ തെരഞ്ഞെടുപ്പുകള്‍ ഏകീകരിക്കുന്നതിനുള്ള ഒരു രാജ്യം ഒരു തെരഞ്ഞെടുപ്പ് ബില്‍ കേന്ദ്രസര്‍ക്കാര്‍ നാളെ ലോക്‌സഭയില്‍ അവതരിപ്പിക്കും. ലോക്‌സഭ നിയമസഭ തെരഞ്ഞെടുപ്പുകള്‍ ഏകീകരിക്കുന്നതിനുള്ള 129ാം ഭരണഘടനാ ഭേദഗതിയും ഡല്‍ഹി, പുതുച്ചേരി, ജമ്മു കശ്മിര്‍ എന്നീ കേന്ദ്രഭരണ പ്രദേശങ്ങളിലെ തെരഞ്ഞെടുപ്പുകള്‍ ഏകീകരിക്കുന്നതിനുള്ള യൂനിയന്‍ ടെറിറ്ററീസ് ലോ ഭേദഗതി ബില്ലുമാണ് കേന്ദ്ര നിയമമന്ത്രി അരുണ്‍ റാം മേഘ് വാള്‍ അവതരിപ്പിക്കുക. ഇരു ബില്ലുകള്‍ക്കും മന്ത്രിസഭായോഗം അനുമതി നല്‍കിയിരുന്നു.

ബില്ലുകള്‍ ലോക്‌സഭയില്‍ അവതരിപ്പിച്ച് സംയുക്ത പാര്‍ലമെന്ററി സമിതിക്ക് വിട്ടേക്കും. മുന്‍ രാഷ്ട്രപതി രാംനാഥ് കോവിന്ദിന്റെ നേതൃത്വത്തിലുള്ള ഉന്നതതല സമിതിയുടെ ശുപാര്‍ശയുടെ അടിസ്ഥാനത്തിലാണ് ബില്‍. ലോക്‌സഭ നിയമസഭ തെരഞ്ഞെടുപ്പുകള്‍ ഒന്നിച്ച് നടത്തുകയും നൂറുദിവസത്തിനുള്ളില്‍ തദ്ദേശ സ്വയം ഭരണ സ്ഥാപനങ്ങളിലേക്കുള്ള തെരഞ്ഞെടുപ്പുകള്‍ നടത്തുകയും ചെയ്യുന്നതിനുള്ള ശുപാര്‍ശയാണ് സമിതി നല്‍കിയത്. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പുകള്‍ സംബന്ധിച്ച തീരുമാനം കേന്ദ്രസര്‍ക്കാര്‍ എടുത്തിട്ടില്ല.