പെരുമ്പാവൂര്‍: കഴിഞ്ഞ വര്‍ഷം കനത്ത മഴയില്‍ തകര്‍ന്ന പാനേക്കാവ് പാലം പുനര്‍നിര്‍മിക്കാന്‍ ഭരണാനുമതി ലഭ്യമായതായി അഡ്വ. എല്‍ദോസ് കുന്നപ്പിള്ളി എം.എല്‍.എ അറിയിച്ചു.
ഒരു കോടി രൂപയാണ് പദ്ധതിക്കായി അനുവദിച്ചത്. സാങ്കേതികനുമതി ലഭ്യമാക്കുന്നതിനായി തുടര്‍ നടപടികള്‍ സ്വീകരിക്കുന്നതിന് നിര്‍ദേശം നല്‍കിയതായും എം.എല്‍.എ പറഞ്ഞു.
തകര്‍ന്ന പാലം പൂര്‍ണമായും പൊളിച്ചു മാറ്റിയാകും പുനര്‍ നിര്‍മിക്കുന്നത്. 9.74 മീറ്റര്‍ നീളത്തിലും 8.5 മീറ്റര്‍ വീതിയിലും പാലം നിര്‍മിക്കുന്നതിനാണ് എസ്റ്റിമേറ്റ് തയാറാക്കിയിരുന്നത്. ഇതൊടനുബന്ധിച്ചുള്ള റോഡിന്റെ സൈഡിലെ കരിങ്കല്‍ ഭീതിയും പൊളിഞ്ഞു പോയിരുന്നു.
അവിടെ കോണ്‍ക്രീറ്റ് ഭിത്തി നിര്‍മിച്ചു സുരക്ഷിതമാക്കും. അപ്രോച്ച് റോഡിലെ തകര്‍ന്ന ഭാഗം ടാര്‍ ചെയ്യുന്നതിനും തുക ഉള്‍ക്കൊള്ളിച്ചിട്ടുണ്ട്. രായമംഗലം ഗ്രാമപഞ്ചായത്തിലെ പി.കെ.വി റോഡിലെ പാനേക്കാവ് പാലം പുനര്‍ നിര്‍മിക്കുന്നതിന് ആവശ്യമായ തുക അനുവദിക്കണമെന്നാവശ്യപ്പെട്ട് പൊതുമരാമത്ത് വകുപ്പ് മന്ത്രി ശ്രീ ജി. സുധാകരന് അഡ്വ. എല്‍ദോസ് കുന്നപ്പിള്ളി എം.എല്‍.എ വിശദമായ എസ്റ്റിമേറ്റ് സഹിതം കഴിഞ്ഞ വര്‍ഷം നിവേദനം സമര്‍പ്പിച്ചിരുന്നു. അതിന്റെ അടിസ്ഥാനത്തിലാണ് ഇപ്പോള്‍ തുക അനുവദിച്ച് ഉത്തരവിറങ്ങിയത്.
മറ്റു നടപടിക്രമങ്ങള്‍ പൂര്‍ത്തീകരിക്കുന്ന മുറക്ക് നിര്‍മ്മാണ പ്രവര്‍ത്തനങ്ങള്‍ ആരംഭിക്കുമെന്ന് എം.എല്‍.എ അറിയിച്ചു.