തലശ്ശേരി: ആശുപത്രി ലിഫ്റ്റിന്റെ സ്വിച്ചില്‍ തൊട്ടുകളിച്ചതിന് 12കാരന് അജ്ഞാതരുടെ മര്‍ദനം.
അഴീക്കല്‍ കോട്ടക്കുന്നുമ്മലിലെ സൗജറിന്റെ മകന്‍ ഹസന്‍ ഷാഗിയെയാണ് ഗുരുതരാവസ്ഥയില്‍ തലശ്ശേരി മിഷന്‍ ആശുപത്രി തീവ്രപരിചരണ വിഭാഗത്തില്‍ പ്രവേശിപ്പിച്ചത്. അപസ്മാരം ഉള്‍പ്പെടെയുള്ള അസുഖങ്ങളുള്ള ചികിത്സയ്ക്കായി ആശുപത്രിയിലെത്തിയതായിരുന്നു ഹസന്‍ ഷാഗി. ഇതിനിടെയാണ് ലിഫ്റ്റിന്റെ സമീപത്തെത്തി സ്വിച്ചില്‍ തൊട്ടുകളിച്ചത്. തുടര്‍ന്ന് സമീപത്തെ മുറിയില്‍നിന്ന് ഇതുകണ്ട രണ്ടുപേര്‍ കുട്ടിയെ തലയ്ക്ക് മര്‍ദിക്കുകയായിരുന്നു. തല്‍ക്ഷണം ബോധമറ്റുവീണ കുട്ടി കുഴഞ്ഞുവീണു. മര്‍ദിച്ചവര്‍ സംഗതി വഷളാവുമെന്നറിഞ്ഞതോടെ സ്ഥലംവിട്ടു. പരാതിയുടെ അടിസ്ഥാനത്തില്‍ രണ്ടുപേര്‍ക്കെതിരേ കേസെടുത്തതായി പൊലിസ് പറഞ്ഞു.