മലപ്പുറം: രാജ്യത്തെ ഗ്രാമീണ ബാങ്ക് ജീവനക്കാര്‍ 26, 27, 28 തിയതികളില്‍ ദേശവ്യാപകമായി പണിമുടക്കുന്നു. ഗ്രാമീണ ബാങ്ക് ജീവനക്കാരുടെ സംഘടനകളുടെ ഐക്യവേദിയായ യുനൈറ്റഡ് ഫോറം ഓഫ് റീജ്യനല്‍ റൂറല്‍ ബാങ്ക് യൂനിയന്‍സി(യു.എഫ്.ആര്‍.ആര്‍.ബി.യു) ന്റെ നേതൃത്വത്തില്‍ രാജ്യത്തെ 56 ഗ്രാമീണ ബാങ്കുകളിലെ 88,000ത്തോളം ജീവനക്കാരും ഓഫിസര്‍മാരും പണിമുടക്കില്‍ അണിചേരുമെന്ന് സംഘടനാ ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
തൊഴിലാളികളുടെയും ഇടപാടുകാരുടെയും രാജ്യത്തിന്റെയും തന്നെ താല്‍പര്യത്തിനു വിരുദ്ധമായ നിലപാടുകളുമായി ദ്രുതഗതിയില്‍ മുന്നോട്ടുപോവുകയാണ് കേന്ദ്രസര്‍ക്കാരെന്നും ഇവര്‍ ചൂണ്ടിക്കാട്ടി.
ഗ്രാമീണബാങ്ക് സ്വകാര്യവല്‍ക്കരണ നീക്കം ഉപേക്ഷിക്കുക, ജീവനക്കാര്‍ക്ക് പെന്‍ഷന്‍ അനുവദിക്കുക, ആശ്രിത നിയമനം പുനഃസ്ഥാപിക്കുക, സ്‌പോണ്‍സര്‍ ബാങ്കിലെ സേവന വ്യവസ്ഥകള്‍ ഗ്രാമീണ ബാങ്കിലും നടപ്പിലാക്കുക, ഗ്രാമീണബാങ്ക് ജീവനക്കാര്‍ക്ക് ചര്‍ച്ചാവേദിയായി ഐ.ബി.എ യെ നിശ്ചയിക്കുക എന്നീ ആവശ്യങ്ങള്‍ ഉന്നയിച്ചാണ് പണിമുടക്ക്.
വാര്‍ത്താസമ്മേളനത്തില്‍ കെ പ്രകാശന്‍, കെ കൃഷണന്‍, പ്രജിത്കുമാര്‍, ടി സോമന്‍ പങ്കെടുത്തു.