തളിപ്പറമ്പ്: അക്രമികളുടെ ദൃശ്യങ്ങള്‍ പൊലിസിന് കൈമാറിയതിന് കീഴാറ്റൂരില്‍ വീണ്ടും വീടിനു നേരെ ആക്രമണം. സുരേഷ് കീഴാറ്റൂരിന്റെ വീടിന് നേരെ അക്രമം നടത്തിയവര്‍ സഞ്ചരിച്ച ബൈക്കുകളുടെ സി.സി.ടിവി ദൃശ്യം പൊലിസിന് കൈമാറിയ വയല്‍ക്കിളി പ്രവര്‍ത്തകന്‍ വിജേഷിന്റെ ഭാര്യവീടിന് നേരെയാണ് അജ്ഞാതസംഘം ആക്രമണം നടത്തിയത്. ഇന്നലെ രാത്രി എട്ടോടെയാണ് കീഴാറ്റൂര്‍ വയലിന് സമീപത്തെ വീട്ടിന് നേരെ ആക്രമണം നടന്നത്. വീട്ടിലെത്തിയ സംഘം ഒരു ജനല്‍ചില്ല് അടിച്ചുതകര്‍ത്ത ശേഷം സിറ്റൗട്ടില്‍ ഒരു ഭീഷണിക്കത്ത് വച്ച് രക്ഷപ്പെടുകയായിരുന്നു.
'സൂക്ഷിച്ചോ വിജേഷേ, സി.സി.ടി.വി നീ എന്തിന് കാണിച്ചുകൊടുത്തു' എന്നാണ് കത്തില്‍ ചോദിക്കുന്നത്. ഭീഷണിക്കത്ത് പൊലിസ് കസ്റ്റഡിയിലെടുത്തു. വിജേഷിന്റെ ഭാര്യാമാതാവ് ടി. അനിത സി.പി.എം കീഴാറ്റൂര്‍ ബ്രാഞ്ചംഗമാണ്. ഇന്നലെ പുലര്‍ച്ചെ വയല്‍ക്കിളി സമരനേതാവ് സുരേഷ് കീഴാറ്റൂരിന്റെ വീടിനു നേര്‍ക്ക് കല്ലേറ് നടത്തിയ സംഘത്തിന്റെ ദൃശ്യങ്ങള്‍ പ്ലാത്തോട്ടം റോഡിലെ വിജേഷിന്റെ വീട്ടില്‍ സ്ഥാപിച്ച സി.സി.ടി.വിയിലാണ് പതിഞ്ഞിരുന്നത്.