കോഴിക്കോട്: പി.ജി വെയിറ്റേജ് നിലനിര്‍ത്തണമെന്ന് കെ.പി.സി.ടി.എ സ്റ്റിയറിങ് കമ്മിറ്റി യോഗം ആവശ്യപ്പെട്ടു.സര്‍ക്കുലറിലൂടെ പതിറ്റാണ്ടുകളായി നിലനിന്നിരുന്ന ബിരുദാനന്തരതലത്തിലെ പ്രത്യേക വെയിറ്റേജ് സമ്പ്രദായം നിര്‍ത്തലാക്കിയത് ജനാധിപത്യവിരുദ്ധവും ദുരുദ്ദേശ്യപരവുമാണെന്ന് യോഗം അഭിപ്രായപ്പെട്ടു.
മൂവായിരത്തില്‍പ്പരം അധ്യാപക തസ്തികകള്‍ ഇല്ലാതാക്കുന്നതും ബിരുദാനന്തര ഗവേഷണ വിദ്യാര്‍ഥികളുടെ ഭാവി ഇരുട്ടിലാക്കുന്നതുമായ നടപടിയില്‍നിന്ന് പിന്‍മാറിയില്ലെങ്കില്‍ പ്രത്യക്ഷ സമരപരിപാടികള്‍ക്ക് നേതൃത്വം നല്‍കുമെന്ന് കെ.പി.സി.ടി. എ ഭാരവാഹികള്‍ അറിയിച്ചു. ജൂണ്‍ 29ന് സംസ്ഥാനവ്യാപകമായി കോളജ് അധ്യാപകര്‍ പണിമുടക്ക് നടത്തും. അന്നേദിവസം പി.ജി വെയിറ്റേജ് നിലനിര്‍ത്തണമെന്ന് ആവശ്യപ്പെട്ട് സെക്രട്ടേറിയറ്റ് മാര്‍ച്ചും ധര്‍ണയും നടത്തും.
സംസ്ഥാന പ്രസിഡന്റ് ജയചന്ദ്രന്‍ കീഴോത്ത്, ഡോ.അബ്ദുല്‍ കലാം, കെ.എം നസീര്‍, ഡോ.പി.ജെ ജോസഫ്, ഡോ.ജോബി തോമസ്, ഡോ.ചെറിയാന്‍ ജോണ്‍ സംസാരിച്ചു.