കോഴിക്കോട്: യേശുക്രിസ്തുവിന്റെ ജറൂസലം പ്രവേശനത്തിന്റെ സ്മരണ പുതുക്കി ക്രൈസ്തവര്‍ ഓശാന പെരുന്നാള്‍ ആചരിച്ചു. ജില്ലയിലെ വിവിധ ദേവാലയങ്ങളില്‍ ഓശാന കുര്‍ബാനയും കുരുത്തോല പ്രദക്ഷിണവും നടന്നു. വിശുദ്ധ വാരാചരണത്തിനും ഇന്നലെ തുടക്കമായി. അടുത്ത ഞായറാഴ്ച ഈസ്റ്ററോടെയാണ് വിശുദ്ധവാരാചരണത്തിന് സമാപനമാകുക.
കോഴിക്കോട് ദേവമാതാ കത്തീഡ്രലില്‍ രാവിലെ 7.30ന് നടന്ന കുരുത്തോല വെഞ്ചിരിപ്പിന് കോഴിക്കോട് രൂപതാ ബിഷപ്പ് റവ. ഡോ.വര്‍ഗീസ് ചക്കാലക്കല്‍ കാര്‍മികത്വം വഹിച്ചു. തുടര്‍ന്ന് സമൂഹ ദിവ്യബലിയും കുരുത്തോല പ്രദക്ഷിണവും നടന്നു.
ഇന്ന് നടക്കുന്ന തൈലാശിര്‍വാദ കര്‍മത്തിനും ദിവ്യബലിക്കും ബിഷപ്പ് നേതൃത്വം നല്‍കും. സെന്റ് മേരീസ് യാക്കോബായ സുറിയാനി കത്തീഡ്രലില്‍ ഫാ. അജോഷ് കരിമണ്ണൂര്‍ നേതൃത്വം നല്‍കി. കോഴിക്കോട് സിറ്റി സെന്റ് ജോസഫ് ദേവാലയത്തിലും ഓശാനാ ഞായര്‍ ആചരിച്ചു.