തിരുവനന്തപുരം: ജില്ലയില്‍ കഞ്ചാവ് ചില്ലറ വില്‍പനക്കാര്‍ക്ക് കഞ്ചാവ് എത്തിച്ച് നല്‍കുന്ന സംഘത്തില്‍പ്പെട്ട രണ്ട് യുവാക്കളെ രണ്ട് കിലോ കഞ്ചാവുമായി സിറ്റി ഷാഡോ പൊലിസിന്റെ പിടിയിലായി.
നെയ്യാറ്റിന്‍കര തൊഴുക്കല്‍ സാജന്‍ നിവാസില്‍ സാജന്‍ (20), മഞ്ചവിളാകം വലിയ പുത്തന്‍വിള വീട്ടില്‍ വിനീഷ് (22) എന്നിവരാണ് തിരുവല്ലം വിത്തടം ഭാഗത്ത് കഞ്ചാവ് എത്തിക്കുന്നതിനിടയിലാണ് പിടിയിലായത്. തിരുവല്ലം പൊലിസ് കേസ് രജിസ്റ്റര്‍ ചെയ്തു. തമിഴ്‌നാട്ടിലെ കമ്പം തേനി എന്നിവിടങ്ങളില്‍ നിന്നും കഞ്ചാവ് എടുത്ത് കേരളാ അതിര്‍ത്തി വരെ എത്തിക്കുന്ന തമിഴ് സംഘങ്ങള്‍ ഉണ്ട്. അവര്‍ തമിഴ്‌നാട് അതിര്‍ത്തി വരെ കഞ്ചാവ് എത്തിക്കുകയുള്ളു.
ഇവരില്‍ നിന്നും കഞ്ചാവ് വാങ്ങി അതിര്‍ത്തി കടത്തി കേരളത്തിലെ കച്ചവടക്കാര്‍ക്ക് ബൈക്കുകളില്‍ സഞ്ചരിച്ച് കഞ്ചാവ് എത്തിക്കുന്ന സംഘത്തിലെ പ്രധാനികളാണ് പിടിയിലായവര്‍. ഇവരില്‍ നിന്നും ഇവിടെ കഞ്ചാവ് വാങ്ങുന്ന കച്ചവടക്കാരുടെ വിവരങ്ങള്‍ കിട്ടിയിട്ടുണ്ട് വരും ദിവസങ്ങളില്‍ കൂടുതല്‍ പേര്‍ കുടുങ്ങുമെന്നും സിറ്റി പൊലിസ് കമ്മിഷണര്‍ പി. പ്രകാശ് ഐ.പി.എസ് അറിയിച്ചു.
ഡി.സി.പി ജയദേവ്, കണ്‍ട്രോള്‍ റൂം അസിസ്റ്റന്റ് കമ്മിഷണര്‍ വി. സുരേഷ് കുമാര്‍, തിരുവല്ലം എസ്.ഐ ശിവകുമാര്‍, എസ്.ഐ ഹരിലാല്‍, ഷാഡോ എസ്.ഐ സുനില്‍ ലാല്‍, എ.എസ്.ഐ ഗോപകുമാര്‍, സിറ്റി ഷാഡോ ടീമംഗങ്ങള്‍ അന്വേഷണത്തിന് നേതൃത്വം നല്‍കി.