കൊണ്ടോട്ടി: സാമ്പത്തിക വര്‍ഷാവസാനത്തില്‍ ഉണ്ടാകുന്ന ട്രഷറി സ്തംഭനം ഒഴിവാക്കാന്‍ തദ്ദേശ സ്വയംഭരണ സ്ഥാപനങ്ങളില്‍ പാര്‍ട്ട് ബില്ല് സമ്പ്രദായം നടപ്പാക്കുന്നു.
തദ്ദേശ സ്ഥാപനങ്ങളുടെ വലിയ പദ്ധതികളുടെ തുക പദ്ധതി തീരുന്നതിന് മുന്‍പു തന്നെ ഘട്ടംഘട്ടം പാര്‍ട്ട് ബില്ലായി ട്രഷറികളില്‍നിന്ന് വാങ്ങുന്നതിനു സര്‍ക്കാര്‍ നിര്‍ദേശം നല്‍കി. പദ്ധതി തുക വര്‍ഷാവസാനത്തില്‍ ഒന്നിച്ചു ചെലവഴിക്കുന്നത് ഒഴിവാക്കുന്നതിനും പദ്ധതി നിര്‍വഹണം വേഗത്തിലാക്കുന്നതിനുമാണ് പാര്‍ട്ട് ബില്ല് സമ്പ്രദായം നടപ്പിലാക്കുന്നത്.
തദ്ദേശ സ്വയംഭരണ സ്ഥാപനങ്ങളില്‍ വലിയ പദ്ധതികള്‍ നടപ്പിലാക്കുമ്പോള്‍ അവ പൂര്‍ത്തീകരിച്ചതിനു ശേഷമാണ് നിലവില്‍ ട്രഷറികളില്‍നിന്ന് ബില്ലുകള്‍ വാങ്ങുന്നത്.
ഇതിനാല്‍ സാമ്പത്തിക വര്‍ഷത്തിന്റെ അവസാനത്തില്‍ ട്രഷറികളുടെ പ്രവര്‍ത്തനം തിരക്കിലമരുകയാണ്. പദ്ധതികള്‍ ഘട്ടംഘട്ടമായി പൂര്‍ത്തിയാക്കുമ്പോള്‍ തന്നെ ബില്ലുകള്‍ വാങ്ങുന്നതോടെ മാര്‍ച്ച് മാസത്തില്‍ വിതരണം ചെയ്യുന്ന ബില്ലുകളും ഫണ്ടുകളും കുറയും.
പാര്‍ട്ട് ബില്ലുകള്‍ നല്‍കുമ്പോള്‍ പദ്ധതികളുടെ തുടര്‍ പ്രവൃത്തി നടത്തുന്നുണ്ടോയെന്ന് ബന്ധപ്പെട്ട ഉദ്യോഗസ്ഥര്‍ നിരീക്ഷിക്കണമെന്ന് പ്രത്യേകം നിര്‍ദേശിച്ചിട്ടുണ്ട്.
ജനുവരി ഒന്നു മുതല്‍ തുടങ്ങിയ പ്രവൃത്തികള്‍ക്ക് പാര്‍ട്ട് ബില്ല് അനുവദിക്കും. റോഡുകളുടെയും കെട്ടിടങ്ങളുടെയും പ്രവൃത്തികളുടെ വലിയ ബില്ലുകളാണ് നിലവില്‍ ട്രഷറികളില്‍ അവസാനം എത്തുന്നത്. ഇതോടെ ചെറിയ തുകയടക്കം ട്രഷറികളില്‍നിന്നു വാങ്ങാന്‍ കഴിയാത്ത അവസ്ഥയാണ്. ഈ വര്‍ഷം തന്നെ 4904.58 കോടി രൂപയുടെ ബില്ലുകള്‍ വിവിധ ട്രഷറികളില്‍ കെട്ടിക്കിടക്കുന്നുണ്ട്. രണ്ടു ദിനങ്ങള്‍ അവധിയായതിനാല്‍ ബില്ലുകള്‍ തീര്‍പ്പാക്കാനാകില്ല. ഈ പ്രതിസന്ധി ഒഴിവാക്കാനാണ് ഈ വര്‍ഷം തന്നെ ട്രഷറികളിലെ അമിതഭാരം കുറയ്ക്കാന്‍ സര്‍ക്കാര്‍ ഒരുങ്ങുന്നത്.