ന്യൂയോര്‍ക്ക്: ഫേസ്ബുക്ക് ഉപയോക്താക്കളുടെ വിവരം ചോര്‍ന്ന സംഭവത്തില്‍ മൊഴി നല്‍കാനായി സി.ഇ.ഒ മാര്‍ക്ക് സുക്കര്‍ബര്‍ഗ് യു.എസ് കോണ്‍ഗ്രസില്‍ ഹാജരാവും. പൊതു ജനങ്ങളുടെയും മാധ്യമങ്ങളുടെയും സമ്മര്‍ദത്തെ തുടര്‍ന്നാണ് മൊഴിനല്‍കാന്‍ സുക്കര്‍ബര്‍ഗ് സന്നദ്ധത അറിയിച്ചതെന്ന് സി.എന്‍.എന്‍ മണി റിപ്പോര്‍ട്ട് ചെയ്തു.
എന്നാല്‍ വിവരം ചോര്‍ന്നതുമായി ബന്ധപ്പെട്ട് ബ്രിട്ടിഷ് പാര്‍ലമെന്റില്‍ മൊഴിനല്‍കാന്‍ ഹാജരാവില്ലെന്ന് സുക്കര്‍ബര്‍ഗ് നേരത്തെ പറഞ്ഞിരുന്നു. പകരം മുതിര്‍ന്ന എക്‌സിക്യുട്ടീവ് ജീവനക്കാരനെയും ഫേസ്ബുക്ക് ചീഫ് പ്രൊഡക്റ്റ് ഓഫിസര്‍ ക്രിസ് കോക്‌സ്‌നെയും അയക്കുമെന്നാണ് അദ്ദേഹം അറിയിച്ചിരുന്നത്.
യു.എസ് കോണ്‍ഗ്രസിലെ മൂന്ന് അംഗ കമ്മിറ്റിയാണ് മൊഴിനല്‍കാനായി സുക്കര്‍ബര്‍ഗിനോട് ആവശ്യപ്പെട്ടത്. ഏപ്രില്‍ പത്തിന് നടക്കുന്ന യോഗത്തില്‍ ഹാജരാവാനാണ് ആവശ്യം. 30 ലക്ഷം അമേരിക്കക്കാരുടെ വിവരങ്ങള്‍ ഫേസ്ബുക്കിലൂടെ ചോര്‍ന്നുവെന്ന വെളിപ്പെടുത്തലിനെ തുടര്‍ന്നാണ് അന്വേഷണത്തിനായി പ്രത്യേക കമ്മിറ്റിയെ നിയോഗിച്ചത്. വിവരങ്ങള്‍ ചോര്‍ന്നതുമായി ബന്ധപ്പെട്ട് മാര്‍ച്ച് 16 മുതലുള്ള ആരോപണത്തെ തുടര്‍ന്ന് ഫേസ്ബുക്കിന്റെ ഓഹരികളില്‍ 18 ശതമാനത്തിന്റെ ഇടിവുണ്ടായിട്ടുണ്ട്.