തിരുവനന്തപുരം: പത്മശ്രീ പുരസ്‌കാരം ലഭിച്ച ലക്ഷ്മിക്കുട്ടിയമ്മയെ കേരള സര്‍വകലാശാല വിദ്യാര്‍ഥികള്‍ ആദരിച്ചു. കാര്യവട്ടം കാംപസില്‍ സംഘടിപ്പിച്ച 'വനമുത്തശ്ശിക്കൊപ്പം ഇത്തിരി നേരം' എന്ന പരിപാടിയിലാണ് തിരുവനന്തപുരം വിതുര സ്വദേശിനിയായ വിഷചികിത്സക പത്മശ്രീ ലക്ഷ്മിക്കുട്ടിയമ്മയെ ആദരിച്ചത്.
അസുഖം വരുമ്പോള്‍ ആശുപത്രിയിലേക്ക് ഓടുന്നതിനു പകരം വീട്ടുമുറ്റത്ത് ഒരു ഔഷധ ചെടിയെങ്കിലും നട്ടു വളര്‍ത്താന്‍ ശ്രമിക്കണമെന്ന് ലക്ഷ്മിക്കുട്ടിയമ്മ വിദ്യാര്‍ഥികളോട് പറഞ്ഞു. വിഷവൈദ്യന്‍ എന്നതിലുപരി സമൂഹത്തിന്റെ വേദനയൊപ്പുന്ന യഥാര്‍ഥ മനുഷ്യനായി ജീവിക്കാനാണ് താന്‍ ശ്രമിക്കുന്നത്.
വിഷചികിത്സക്ക് പരമ്പരാഗതമായി പകര്‍ന്നുകിട്ടിയ അറിവുകളോടൊപ്പം മന്ത്രവും പ്രയോഗിക്കാറുണ്ടെന്നു പറഞ്ഞ വനമുത്തശ്ശി മരുന്നു കൊണ്ടും മന്ത്രം കൊണ്ടും മാറ്റാനാവാത്ത മാരകവിഷമാണ് മനുഷ്യന്‍ വാക്കുകളിലൂടെ പടര്‍ത്തുന്നത് എന്ന് സമകാലീന സാഹചര്യങ്ങളെ ഉദ്ധരിച്ചുകൊണ്ട് വിദ്യാര്‍ഥി സമൂഹത്തെ ഓര്‍മിപ്പിച്ചു.
കവയത്രി കൂടിയായ ലക്ഷ്മിക്കുട്ടിയമ്മ കവിതകള്‍ ചൊല്ലി വിദ്യാര്‍ഥികള്‍ക്ക് പുത്തനുണര്‍വ് പകര്‍ന്നു. വനവാസിക്ക് വനം നഷ്ടപ്പെടുന്ന വര്‍ത്തമാനകാല ജീവിതസാഹചര്യങ്ങളുടെ ആകുലതകളും വനത്തില്‍ നിന്ന് അപൂര്‍വ ഔഷധസസ്യങ്ങള്‍ ശേഖരിക്കുന്നതിലുള്ള പരിമിതികളും അവര്‍ പങ്കുവെച്ചു. ഒരു നാട്ടിന്‍പ്പുറത്തുകാരിയുടെ ഡല്‍ഹി യാത്രയും പത്മ പുരസ്‌കാര വേദിയില്‍ രാഷ്ട്രപതിയുമായുള്ള സംഭാഷണങ്ങളും അവര്‍ ഓര്‍മ്മിച്ചെടുത്തു.
ലാളിത്യവും നന്മയും കലര്‍ന്ന ഭാഷയില്‍ തന്റെ അനുഭവങ്ങള്‍ വിദ്യാര്‍ഥികളുമായി സംവദിച്ച ലക്ഷ്മിക്കുട്ടിയമ്മയെ കേരള സര്‍വകലാശാല സിന്‍ഡിക്കേറ്റ് അംഗം രാധാമണി ടീച്ചര്‍ പൊന്നാടയണിയിച്ച് ആദരിച്ചു. ശേഷം വനമുത്തശ്ശിക്കുള്ള യൂനിയന്റെ സ്‌നേഹോപഹാരം സമ്മാനിച്ചു.
യൂനിയന്‍ ചെയര്‍മാന്‍ അതുല്‍ അധ്യക്ഷനായ ചടങ്ങില്‍ വൈസ് ചെയര്‍മാന്‍ അനോമ, അതുല്യ സംസാരിച്ചു.