കല്‍പ്പറ്റ: പാചകവാത സബ്‌സിഡി മറ്റൊരു അക്കൗണ്ടിലേക്ക് മാറിക്കയറുന്നെന്ന് പരാതി. ഉപഭോക്താവ് പരാതിപ്പെട്ടപ്പോള്‍ ഇതുമായി ബന്ധപ്പെട്ടവര്‍ കൈമലര്‍ത്തുകയാണെന്നും ആക്ഷേപമുണ്ട്. കല്‍പ്പറ്റ ഭാരത് ഗ്യാസ് ഏജന്‍സിയില്‍ നിന്നും കണക്ഷനെടുത്ത പിണങ്ങോട് സ്വദേശി അബൂബക്കര്‍ ഹാജിയുടെ പാചകവാത സബ്‌സിഡിയാണ് മറ്റൊരാളുടെ അക്കൗണ്ടിലേക്ക് കഴിഞ്ഞ മൂന്നുമാസമായി മാറിക്കയറുന്നത്.
ഇതുമായി ബന്ധപ്പെട്ട് കല്‍പ്പറ്റയിലെ ഗ്യാസ് ഏജന്‍സിയെ സമീപിച്ചെങ്കിലും അവര്‍ കൈ മലര്‍ത്തുകയായിരുന്നു. പാചകവാത സബ്‌സിഡിക്കായി അബൂബക്കര്‍ ഹാജി ഗ്യാസ് ഏജന്‍സിയില്‍ നല്‍കിയിരിക്കുന്നത് കേരള ഗ്രാമീണ്‍ ബാങ്കിന്റെ അക്കൗണ്ട് നമ്പറാണ്.
ഒപ്പം ആധാര്‍ നമ്പറും നല്‍കിയിട്ടുണ്ട്. തുടര്‍ന്ന് മുടക്കമില്ലാതെ അബൂബക്കര്‍ ഹാജിയുടെ അക്കൗണ്ടിലേക്ക് തന്നെ പണം വന്നുചേരുകയും ചെയ്തിരുന്നു. എന്നാല്‍ കഴിഞ്ഞ നവംബറില്‍ തുക അക്കൗണ്ടില്‍ കയറിയില്ല.
ഗ്യാസ് ഏജന്‍സിയുമായി ബന്ധപ്പെട്ടപ്പോഴാണ് തുക എച്ച്.ഡി.എഫ്.സി ബാങ്കിലെ മറ്റൊരാളുടെ അക്കൗണ്ടിലേക്ക് കൃത്യമായി പോകുന്നുണ്ടെന്ന് മനസിലായത്. എന്നാല്‍ ഇത്തരത്തില്‍ തന്റെ പേരില്‍ ഒരു അക്കൗണ്ടില്ലെന്ന് അധികൃതരെ ഇദ്ദേഹം അറിയിച്ചപ്പോള്‍ നിങ്ങള്‍ ലീഡ് ബാങ്കില്‍ ഒരു പരാതി നല്‍കൂവെന്നാണ് മറുപടി ലഭിച്ചത്.
കൃത്യമായി അക്കൗണ്ട് നമ്പര്‍ നല്‍കുകയും ആധാര്‍ നമ്പര്‍ നല്‍കുകയും ചെയ്തിട്ടും അധികൃതരുടെ ഭാഗത്ത് നിന്ന് ഉണ്ടായ നോട്ടപ്പിശകിന് മൂന്നുമാസത്തെ പാചകവാത സബ്‌സിഡിയാണ് ഉപഭോക്താവിന് നഷ്ടമായാത്.
അധികൃതരുടെ ഭാഗത്തു നിന്നും ഇത് പരിഹരിക്കാന്‍ അടിയന്തര നടപടിയുണ്ടാകണമെന്നാണ് ഉപഭോക്താവിന്റെ ആവശ്യം.