കല്‍പ്പറ്റ: കേരള സംസ്ഥാന സര്‍ക്കിള്‍ ഫെന്‍സിങ് ചാംപ്യന്‍ഷിപ്പില്‍ വയനാട് ജില്ലാ ടീമിന് നേട്ടം. സബ് ജൂനിയര്‍, ജൂനിയര്‍ വിഭാഗങ്ങളില്‍ സംസ്ഥാന തലത്തില്‍ ഒന്നാം സ്ഥാനവും ഓവറോള്‍ രണ്ടാം സ്ഥാനവും വയനാട് ജില്ലാ ടീം കരസ്ഥമാക്കിയാണ് വയനാട് നേട്ടം കൊയതത്.
ആറു സ്വര്‍ണവും രണ്ടു വെള്ളിയും  അഞ്ചു വെങ്കലവുമാണ് ജില്ലാ ടീം നേടിയത്. മിനി സബ് ജൂനിയര്‍, ജൂനിയര്‍, സീനിയര്‍  വിഭാഗങ്ങളില്‍ ഏപ്പി, ഫോയില്‍, സാമ്പര്‍ എന്നീ വിഭാഗങ്ങളിലായിരുന്നു മത്സരം. മുഹമ്മദ് റിഷാന്‍,  സംജിത്ത് റോഷല്‍, ബിന്‍ഷാദ് കണ്ണമ്പറ്റ എന്നിവര്‍ സ്വര്‍ണവും സംജിത്ത റോഷല്‍, ആഷീഷ് തോമസ് എന്നിവര്‍ വെള്ളിയും റിനൂഷ്  മഹര്‍ഷന്‍, അബിന്‍ സാജു, അനന്ത കിഷ്വര്‍ എന്നിവര്‍ വെങ്കലവും നേടി  ജേതാക്കളായി.
വിജയികളെ വയനാട്  ജില്ലാ സര്‍ക്കിള്‍ ഫെന്‍സിങ് അസോസിയേഷന്‍ ജില്ലാ കമ്മിറ്റി പ്രസിഡന്റ്  ഹാജി എ.കെ ഇബ്രാഹിം ഗുരുക്കളുടെ അധ്യക്ഷതയില്‍ ചേര്‍ന്ന അനുമോദന യോഗത്തില്‍  കല്‍പ്പറ്റ നഗരസഭ ചെയര്‍പേഴ്‌സണ്‍ ബിന്ദു ജോസ് വിജയികള്‍ക്കുള്ള മെഡലുകളും സര്‍ട്ടിഫിക്കറ്റുകളും നല്‍കി.
ജില്ലാ സ്‌പോര്‍ട്‌സ് കൗണ്‍സില്‍ വൈ.പ്രസിഡന്റ്  ടോമി ഫിലിപ്പ്, വാര്‍ഡ് കൗണ്‍സിലര്‍ അജിത, കെ.എഫ്.ഐ ജില്ലാ സെക്രട്ടറി ഗ്രിഗറി വൈത്തിരി, ജില്ലാ ട്രഷറര്‍ ബഷീര്‍ കണ്ണംമ്പറ്റ, സര്‍ക്കിള്‍ ഫെന്‍സിങ് അസോസിയേഷന്‍ ജില്ലാ സെക്രട്ടറി ബിന്‍ഷാദ് കണ്ണമ്പറ്റ എന്നിവര്‍  സംസാരിച്ചു.