മലപ്പുറം: ഇഡ്ഡലിത്തട്ടില്‍ കൈവിരല്‍ കുടുങ്ങിയ ഒന്നര വയസുകാരിക്കു ഫയര്‍ഫോഴ്‌സ് തുണയായി. ഇന്നലെ വൈകിട്ട് 6.30നാണ് സ്റ്റീല്‍ നിര്‍മിത ഇഡ്ഡലി തട്ടില്‍ കൈവിരല്‍ കുടുങ്ങിയ നിലയില്‍ പന്തല്ലൂര്‍ മുടിക്കോട് സ്വദേശി ചക്കിപ്പറമ്പന്‍ മുഹമ്മദിന്റെ മകള്‍ ഫഹ്മിദയെ മലപ്പുറം ഫയര്‍ഫോഴ്‌സ് നിലയത്തില്‍ എത്തിച്ചത്.
തുടര്‍ന്ന് ഒരു മണിക്കോറോളം നീണ്ട പരിശ്രമത്തിനൊടുവില്‍ യാതൊരു പരുക്കുമില്ലാതെ പാത്രം മുറിച്ചുമാറ്റി കുട്ടിയെ രക്ഷപ്പെടുത്തുകയായിരുന്നു. ലീഡിങ് ഫയര്‍മാന്‍ അബ്ദുസ്സലീം, ഗ്രേഡ് അസിസ്റ്റന്റ് സെക്ഷന്‍ ഓഫിസര്‍ സി. ശിവശങ്കരന്‍ എന്നിവരുടെ നേതൃത്വത്തിലുള്ള സംഘമാണ് രക്ഷാപ്രവര്‍ത്തനം നടത്തിയത്.