ചാവക്കാട്: ചാവക്കാട് സബ്ജയിലില്‍ തടവുകാരന് സഹതടവുകാരായ മൂന്ന് പേരില്‍ നിന്ന് മര്‍ദനമേറ്റു.ശനിയാഴ്ച വൈകീട്ട് അഞ്ചോടെയാണ് സംഭവം. പാവറട്ടി തൊയക്കാവ് മാഞ്ചിറമ്പത്ത് സുമേഷി(39)നാണ് പരുക്കേറ്റത്.
ജയില്‍ സൂപ്രണ്ടിന്റെ നേതൃത്വത്തില്‍ സുമേഷിനെ ചാവക്കാട് താലൂക് ആശുപത്രിയില്‍ പ്രവേശിപ്പിച്ചു. കക്കൂസില്‍ പോയി വന്ന സുമേഷ് വേണ്ടവിധം ശുചീകരിച്ചില്ലെന്നാരോപിച്ചായിരുന്നു ആലപ്പുഴ നടുവട്ടം സ്വദേശി സന്ദീപ്(40),വേലൂര്‍ തയ്യൂര്‍ സ്വദേശി സാജന്‍(28),ചേലക്കര സ്വദേശി അബ്ദുള്‍ റഹീം(27) എന്നിവരുമായി വാക്കുതര്‍ക്കമുണ്ടായത്.
വാക്കുതര്‍ക്കത്തിനൊടുവില്‍ മൂവരും ചേര്‍ന്ന് കൈകൊണ്ട് സുമേഷിനെ മര്‍ദിക്കുകയായിരുന്നു. നാലു പേരും ഒരു സെല്ലിലാണ് കഴിയുന്നത്.
95-ല്‍ ഒരു പീഡനകേസില്‍ പിടി കിട്ടാപ്പുള്ളിയായി വിദേശത്തേക്കു കടന്ന സുമേഷിനെ നാട്ടിലെത്തിയപ്പോഴാണ് പൊലിസ് അറസ്റ്റു ചെയ്ത് റിമാന്‍ഡ് ചെയ്തത്. സന്ദീപ് വഞ്ചന കേസിലും സാജന്‍ കഞ്ചാവുകേസിലും അബ്ദുള്‍ റഹീം വാഹനമോഷണ കേസിലും പെട്ടാണ് ജയിലില്‍ കഴിയുന്നത്.
രാത്രിയോടെ ചികിത്സക്കു ശേഷം സുമേഷിനെ ജയിലില്‍ തിരിച്ചെത്തിച്ചു. ജയില്‍ സൂപ്രണ്ട് തോമസിന്റെ പരാതിയില്‍ ചാവക്കാട് പൊലിസ് മൂന്നു പേര്‍ക്കുമെതിരെ കേസെടുത്തു.
മൂന്ന് തടവുകാരെയും വിയ്യൂര്‍ സെന്‍ട്രല്‍ ജയിലിലേക്ക് മാറ്റാനുള്ള നടപടി ആരംഭിച്ചു.