കുന്നംകുളം: വീട്ടു മതിലിലിരുന്ന് മദ്യം കഴിക്കുന്നത് വിലക്കിയതിനെ തുടര്‍ന്ന് വീട്ടിലേക്ക് യുവാക്കളുടെ കരി ഓയില്‍ പ്രയോഗം. പഴഞ്ഞി ഹൈസക്കൂളിനു സമീപം തറമേല്‍ വീട്ടില്‍ പരേതനായ കേശവന്റെ ഭാര്യ ദേവകിയാണ് കരി ഓയിലില്‍ ചവിട്ടി തെന്നിവീണ് പരുക്കേറ്റത്.
ദേവകി ഒറ്റക്കാണ് താമസം. രാത്രിയില്‍ വീടിന്റെ മതിലില്‍ ഇരുന്ന് പരിസരവാസികളായ യുവാക്കള്‍ പതിവായി മദ്യ കഴിക്കാറുണ്ടെന്ന് ഇവര്‍ പറയുന്നു. ബഹളവും മറ്റും അസഹനീയമായപ്പോള്‍ ഇവിടെ ഇരിക്കരുതെന്ന് പറഞ്ഞു.
ഇതിന്റെ വൈരാഗ്യത്തില്‍ രാത്രി എത്തിയ യുവാക്കള്‍ വീടിന്റെ ചുമരിലും ഗ്രില്ലിനകത്തേക്കും കരി ഒയില്‍ ഒഴിച്ചു. ഇതറിയാതെ രാവിലെ എഴുന്നേറ്റ് വന്ന ദേവകി ഇതില്‍ ചവിട്ടി വീഴുകയായിരുന്നു.
പിന്നീട് പരിസരവാസികളുടെ സഹായത്തോടെ ആശുപത്രിയിലെത്തിച്ച് കയ്യില്‍ പ്ലാസ്റ്ററിട്ടു.
അടുത്ത ദിവസം ചുമരുകള്‍ മുഴുവന്‍ പെയിന്റ് ചെയ്തതായിരിന്നുവെന്നും അയല്‍ക്കാരുമായി നല്ല ബന്ധത്തിലാണെന്നും ഇവര്‍ പറയുന്നു.
രാത്രിയിലുള്ള മദ്യപാനം തുടര്‍ന്നാല്‍ പരാതി നല്‍കുമെന്ന് പറഞ്ഞ വൈരാഗ്യത്തിലാണ് ഇത് ഉണ്ടായതെന്നും ദേവകി പറയുന്നു. കുന്നംകുളം പൊലിസില്‍ പരാതി നല്‍കി.