സുല്‍ത്താന്‍ ബത്തേരി: ബൈക്കിലെത്തിയ രണ്ടുപേര്‍ യുവാവിനെ മര്‍ദിച്ച് പണവും ആഭരണവും കവര്‍ന്നതായി പരാതി. ചീരാല്‍ സ്വദേശി അമരമ്പത്ത് ജിതിനാണ് ആക്രമണത്തിന് ഇരയായത്.
ചൊവ്വാഴ്ച രാത്രി എട്ടോടെ സുല്‍ത്താന്‍ ബത്തേരി പാട്ടവയല്‍ റൂട്ടില്‍ ഗവ. ഗസ്റ്റ് ഹൗസിന് സമീപമാണ് സംഭവം. സുല്‍ത്താന്‍ ബത്തേരിയില്‍ നിന്ന് നമ്പിക്കൊല്ലിയിലേക്ക് ബൈക്കില്‍ പോകുമ്പോള്‍ മറ്റൊരു ബൈക്ക് തന്നെ പിന്തുടരുന്നതില്‍ സംശയം തോന്നി തിരിച്ച് വിണ്ടും സുല്‍ത്താന്‍ ബത്തേരിയിലേക്ക് വരുന്ന സമയത്താണ് ഗവ. ഗസ്റ്റ് ഹൗസിന്റെ സമീപത്ത് വെച്ച് ബൈക്ക് കുറുകെയിടുകയും ആക്രമിക്കുകയും ചെയ്‌തെന്നാണ് ജിതിന്‍ പറയുന്നത്.
ജോലി സംബന്ധമായി തന്റെ കൈ വശമുണ്ടായിരുന്ന പണം ചുങ്കത്ത് വെച്ച് എണ്ണുന്നത് കണ്ടവരാണ് ഇതിനു പിന്നിലെന്നും ഒരാളെ കണ്ടാലറിയാമെന്നും ജിതിന്‍ പറയുന്നു. ആക്രമണത്തിന് ശേഷം പ്രതികള്‍ ഓടിരക്ഷപ്പെട്ടു. കൈവശമുണ്ടായിരുന്ന അമ്പതിനായിരം രൂപയും രണ്ടര പവന്‍ സ്വര്‍ണമാലയും അക്രമികള്‍ കവര്‍ന്നതായും ജിതിന്‍ പൊലിസില്‍ നല്‍കിയ പരാതിയില്‍ പറയുന്നു. പരാതിയില്‍ സുല്‍ത്താന്‍ ബത്തേരി പൊലിസ് കേസെടുത്ത് അന്വേഷണം ആരംഭിച്ചു.