ടിയാന്‍ജിന്‍: ഇന്ത്യയുടെ വെറ്ററന്‍ ടെന്നീസ് ഇതിഹാസം ലിയാണ്ടര്‍ പെയ്‌സിന് ചരിത്ര നേട്ടം. ഡേവിസ് കപ്പില്‍ ഏറ്റവും കൂടുതല്‍ വിജയങ്ങള്‍ സ്വന്തമാക്കുന്ന ഡബിള്‍സ് താരമെന്ന റെക്കോര്‍ഡാണ് പെയ്‌സ് സ്വന്തമാക്കിയത്.
വേള്‍ഡ് ഗ്രൂപ്പ് പ്ലേയോഫില്‍ ചൈനക്കെതിരായ ഏഷ്യ- ഓഷ്യാനിയ ഗ്രൂപ്പ് പോരാട്ടത്തിന്റെ രണ്ടാം റൗണ്ടില്‍ ജയിച്ച് ഡേവിസ് കപ്പില്‍ 43ാം ഡബിള്‍സ് വിജയം കുറിച്ചാണ് വെറ്ററന്‍ താരം അപൂര്‍വ നേട്ടം സ്വന്തം പേരിലാക്കിയത്. പെയ്‌സും രോഹന്‍ ബൊപ്പണ്ണയും അടങ്ങിയ സഖ്യം ചൈനയുടെ മാവോ സിന്‍ ഗോങ്- സി സാങ് സഖ്യത്തെ പരാജയപ്പെടുത്തി. കടുത്ത പോരാട്ടം കണ്ട മത്സരത്തില്‍ 5-7, 7-6 (5), 7-6 (3) എന്ന സ്‌കോറിനാണ് സഖ്യം വിജയിച്ചത്.
പ്ലേയോഫിലെ ആദ്യ രണ്ട് സിംഗിള്‍സ് മത്സരങ്ങളും തോറ്റതോടെ ഇന്ത്യ പരുങ്ങലിലായ സമയത്താണ് പെയ്‌സും ബൊപ്പണ്ണയും കളിക്കാനിറങ്ങിയത്.
ഇരുവരും നേടിയ വിജയത്തിന്റെ ബലത്തില്‍ ഇന്ത്യ ചൈനയെ 3-2ന് കീഴടക്കി.
42 വിജയങ്ങളുമായി ഇറ്റാലിയന്‍ ഇതിഹാസം നിക്കോള പിയട്രാന്‍ഗലിക്കൊപ്പം റെക്കോര്‍ഡ് പങ്കിടുകയായിരുന്നു പെയ്‌സ് ഇതുവരെ.
1990ല്‍ സീഷന്‍ അലിക്കൊപ്പം ഡബിള്‍സ് കളിച്ചാണ് പെയ്‌സ് ഡേവിസ് കപ്പ് പോരാട്ടത്തിന് തുടക്കമിട്ടത്. ഭൂപതിക്കൊപ്പം ചേര്‍ന്ന് ഡേവിസ് കപ്പില്‍ തോല്‍വിയറിയാതെ 24 മത്സരങ്ങള്‍ പൂര്‍ത്തിയാക്കിയ നേട്ടവും പെയ്‌സിനുണ്ട്.