കൊല്ലം: ലോകാരോഗ്യ ദിനത്തിന്റെ ഭാഗമായി ജില്ലാ മെഡിക്കല്‍ ഓഫിസും ജോയ് ആലുക്കാസ് ഫൗണ്ടേഷനും ചേര്‍ന്ന് സൗജന്യ ആരോഗ്യ പരിശോധന ക്യാംപുകളും റാലിയും സംഘടിപ്പിച്ചു.
സാര്‍വത്രിക ആരോഗ്യസേവനം എല്ലാവര്‍ക്കും എല്ലായിടത്തും എന്ന സന്ദേശം പകര്‍ന്നായിരുന്നു ഇത്തവണത്തെ ദിനാചരണം.
ചിന്നക്കട ജോയ് ആലുക്കാസ് ഷോറൂം പരിസരത്തു നിന്നാരംഭിച്ച റാലിയോടെയാണ് പരിപാടികള്‍ തുടങ്ങിയത്. ജില്ലാ ക്രൈംബ്രാഞ്ച് അസിസ്റ്റന്റ് കമ്മീഷണര്‍ എ. അശോകന്‍ ഫ്‌ളാഗ് ഓഫ് നിര്‍വഹിച്ചു.
വിവിധ സ്ഥാപനങ്ങളിലെ ജീവനക്കാര്‍, വിദ്യാര്‍ഥികള്‍, ആശാപ്രവര്‍ത്തകര്‍ പങ്കെടുത്തു. നാഷണല്‍ ഹെല്‍ത്ത് മിഷന്‍ ജില്ലാ ട്രെയിനിംഗ് സെന്ററിലാണ് റാലി സമാപിച്ചത്.
ദിനാചരണത്തോടനുബന്ധിച്ച സെമിനാര്‍ ജില്ലാ പഞ്ചായത്ത് പ്രസിഡന്റ് സി. രാധാമണി ഉദ്ഘാടനം ചെയ്തു. ആരോഗ്യ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ ജൂലിയറ്റ് നെല്‍സണ്‍ അധ്യക്ഷത വഹിച്ചു. ഡെപ്യൂട്ടി ഡി.എം.ഒമാരായ ഡോ. മണികണ്ഠന്‍, ഡോ. സന്ധ്യ, നാഷണല്‍ ഹെല്‍ത്ത് മിഷന്‍ പ്രോഗ്രാം മാനേജര്‍ ഡോ. ഹരികുമാര്‍ ആശംസ അര്‍പ്പിച്ചു.