തിരുവനന്തപുരം: വേങ്ങരയിലെ ഭൂമി ഏറ്റെടുക്കല്‍ പ്രശ്‌നത്തില്‍ സര്‍വകക്ഷി യോഗം വിളിച്ചതുപോലെ കീഴാറ്റൂരിലും പ്രശ്‌നം പരിഹരിക്കുന്നതിന് അടിയന്തരമായി സര്‍വകക്ഷിയോഗം വിളിക്കണമെന്നാവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല മുഖ്യമന്ത്രിക്ക് കത്തു നല്‍കി.
കീഴാറ്റൂരില്‍ ദേശീയപാത ബൈപാസിന് വേണ്ടി നെല്‍വയല്‍ ഏറ്റെടുക്കാനുള്ള സര്‍ക്കാര്‍ ശ്രമത്തിനെതിരേ വയല്‍ക്കിളികള്‍ നടത്തുന്ന സമരത്തെ അടിച്ചമര്‍ത്താനും അപഹസിക്കാനുമാണ് സര്‍ക്കാര്‍ ശ്രമിക്കുന്നത്. സി.പി.എമ്മിന്റെ സംഘടിത ശക്തി ഉപയോഗിച്ച് സമരത്തെ ഞെക്കിക്കൊല്ലാനും ശ്രമിക്കുന്നു. ഇതിനെതിരേ സംസ്ഥാന വ്യാപകമായി ഉണര്‍ന്നിരിക്കുന്ന വികാരം സര്‍ക്കാര്‍ കണ്ടില്ലെന്ന് നടിക്കരുതെന്നും ചെന്നിത്തല കത്തില്‍ പറയുന്നു.