കാസര്‍കോട്: ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് കാര്‍ട്ടൂണിസ്റ്റ്‌സിന്റെ മികച്ച യുവ കാര്‍ട്ടൂണിസ്റ്റിനുള്ള പുരസ്‌കാരം കാസര്‍കോട് ആദൂര്‍ മഞ്ഞംപാറ സ്വദേശി അലി ഹൈദറിന്. പത്താമത് മായാ കമ്മത്ത് മെമ്മോറിയല്‍ പുരസ്‌കാരമാണ് അലി ഹൈദറിനെ തേടിയെത്തിയത്. 10,000 രൂപയും ഫലകവും അടങ്ങുന്ന പുരസ്‌കാരം ജൂണ്‍ ആദ്യ വാരം ബംഗളൂരുവില്‍ വച്ച് സമ്മാനിക്കും. പയ്യന്നൂര്‍ കോളജിലെ അവസാന വര്‍ഷ പൊളിറ്റിക്കല്‍ സയന്‍സ് വിദ്യാര്‍ഥിയായ അലി ഹൈദര്‍ കേരളാ കാര്‍ട്ടൂണ്‍ അക്കാദമിയിലെ പ്രായം കുറഞ്ഞ അംഗം കൂടിയാണ്. കണ്ണൂര്‍ യൂനിവേഴ്‌സിറ്റി കലോത്സവത്തില്‍ കാര്‍ട്ടൂണില്‍ ഒന്നാം സ്ഥാനം നേടിയിട്ടുണ്ട്. ബംഗളൂരു ഉള്‍പ്പെടെ വിവിധ സ്ഥലങ്ങളില്‍ കാര്‍ട്ടൂണ്‍ എക്‌സിബിഷനും നടത്തിയിട്ടുണ്ട്.