കൊച്ചി: പാട്ട കാലാവധി അവസാനിച്ച ശേഷം ഉപേക്ഷിക്കുന്ന പാറമടകളില്‍ ഭാവിയില്‍ അപകടമുണ്ടാകാതിരിക്കാന്‍ പാട്ടത്തിനെടുത്ത കക്ഷികളെ കൊണ്ടുതന്നെ ചുറ്റുമതില്‍ ഉള്‍പ്പെടെയുള്ള സംരക്ഷണ പ്രവര്‍ത്തനങ്ങള്‍ നടത്തുന്നതിന് ബന്ധപ്പെട്ട ജിയോളജിസ്റ്റിന്് നിര്‍ദേശം നല്‍കണമെന്ന് സര്‍ക്കാരിനോട് സംസ്ഥാന മനുഷ്യാവകാശ കമ്മിഷന്‍. പരിസ്ഥിതി പഠനം പാഠ്യവിഷയമാക്കിയ വിദ്യാര്‍ഥികളുടെ ഗ്രൂപ്പുണ്ടാക്കി ഉപയോഗശൂന്യമായ പാറമടകളുടെ സംരക്ഷണം സംബന്ധിച്ചുള്ള ഉത്തരവാദിത്വം ഏറ്റെടുപ്പിക്കണമെന്നും കമ്മിഷന്‍ അധ്യക്ഷന്‍ പി മോഹനദാസ് ആവശ്യപ്പെട്ടു. ബന്ധപ്പെട്ട ജിയോളജിസ്റ്റിന്റെ നേതൃത്വത്തില്‍ പദ്ധതി നടപ്പിലാക്കണം.
എറണാകുളം ജില്ലയില്‍ പ്രവര്‍ത്തനരഹിതമായ മുഴുവന്‍ പാറമടകളിലും സുരക്ഷയ്ക്കായുള്ള പ്രവര്‍ത്തനങ്ങള്‍ നടത്തി സംബന്ധിച്ച് രണ്ട് മാസത്തിനകം റിപ്പോര്‍ട്ട് നല്‍കണമെന്നും കമ്മിഷന്‍ ആവശ്യപ്പെട്ടു.
പെരുമ്പാവൂര്‍ വെങ്ങോല സ്വദേശി തോമസ് കെ ജോര്‍ജ് സമര്‍പ്പിച്ച പരാതിയിലാണ് നടപടി. ജില്ലയിലെ പ്രവര്‍ത്തനരഹിതമായ പാറമടകളില്‍ അപകടങ്ങള്‍ ഉണ്ടാകാതെ സംരക്ഷിക്കുന്നതിന് പാറമട സേഫ്റ്റി ഫണ്ട് രൂപീകരിച്ചിട്ടുണ്ടെന്ന് എറണാകുളം ജില്ലാ കലക്ടര്‍ കമ്മിഷനെ അറിയിച്ചു.
2017 നവംബര്‍ 15 ന് ഫണ്ട് വിനിയോഗിക്കുന്നത് സംബന്ധിച്ച യോഗം ചേര്‍ന്നെങ്കിലും യാതൊരു നടപടികളും സ്വീകരിച്ചിട്ടില്ലെന്ന് കമ്മിഷന്‍ വിലയിരുത്തി. പാറമട നടത്തിയ ശേഷം ഉപേക്ഷിച്ചവരില്‍ പലരും പാറമട സംരക്ഷണ ഫണ്ട് അടയ്ക്കാത്തവരാണെന്ന് പരാതിക്കാരന്‍ കമ്മിഷനെ അറിയിച്ചു.