ആലപ്പുഴ: സ്വകാര്യ ആംബുലന്‍സുകളെ ആലപ്പുഴ മെഡിക്കല്‍ കോളജ് ആശുപത്രിക്ക് പുറത്താക്കാനുള്ള നടപടി അവസാനിപ്പിക്കണമെന്ന് സംയുക്ത ആംബുലന്‍സ് ഡ്രൈവേഴ്‌സ് യൂണിയന്‍ വാര്‍ത്താസമ്മേളനത്തില്‍ പറഞ്ഞു. മെഡിക്കല്‍ കോളജ് ആശുപത്രിക്ക് ആകെ ഒരു ആംബുലന്‍സ് മാത്രമാണുള്ളത്.
മെഡിക്കല്‍ കോളജിന്റെ ഫ്രീ ഓട്ടങ്ങളും ബാക്കിയുള്ള ഓട്ടങ്ങളും സര്‍വ്വീസ് നടത്തുന്നതും ഇവിടെയുള്ള സ്വകാര്യ ആംബുലന്‍സുകളാണ്. ഇവിടെ നിന്നും സ്വകാര്യ ആംബുലന്‍സുകളെ പുറത്താക്കിയത് മുതല്‍ ആംബുലന്‍സുകളുടെ ഓട്ടം നിലച്ചിരിക്കുകയാണ്. ആശുപത്രി കോമ്പൗണ്ടില്‍ സ്റ്റാന്റ് ഉറപ്പിച്ചിരിക്കുന്ന ടാക്‌സി, ഓട്ടോ എന്നിവയ്ക്ക് ഇതുവരെ സര്‍വ്വീസ് നടത്തുന്നതിന് യാതൊരു തടസ്സങ്ങളും ഉണ്ടായിട്ടില്ല.
24 മണിക്കൂറും ആതുരസേവന രംഗത്ത് പ്രവര്‍ത്തിക്കുന്ന ആംബുലന്‍സുകള്‍ക്കെതെരെയുള്ള നടപടികള്‍ പൊതുജനങ്ങള്‍ തിരിച്ചറിയണമെന്നും അധികൃതരുടെ നടപടി തുടര്‍ന്നാല്‍ സൂപ്രണ്ടിന്റെ ഓഫീസിന് മുന്നില്‍ നിരാഹാരം നടത്തുമെന്നും സംയുക്ത ഡ്രൈവേഴ്‌സ് യൂണിയന്‍ പറഞ്ഞു. വാര്‍ത്താസമ്മേളനത്തില്‍ ലത്തീഫ് എം കെ, സജീവ് ആര്‍, ജോസഫ് വി പി, മുഹമ്മദ് സാദിഖ്, ബദറുദ്ദീന്‍ എ എന്നിവര്‍ പങ്കെടുത്തു.