മടിക്കൈ: വിവാഹം കഴിക്കാതെ 'പുരനിറഞ്ഞു' നില്‍ക്കുന്ന പുരുഷന്മാര്‍ക്കായി വനിതകള്‍ സംഗമമൊരുക്കുന്നു. മടിക്കൈ പഞ്ചായത്ത് കുടുംബശ്രീ സി.ഡി.എസിന്റെ വാര്‍ഷികത്തിന്റെ ഭാഗമായാണ് വേറിട്ട ഈ സംഗമം നടക്കുന്നത്. പെണ്‍കുട്ടികളുടെ മാറിയ ഭര്‍തൃസങ്കല്‍പങ്ങളാണു പ്രധാനമായും പുരുഷന്മാര്‍ക്കു വധുവിനെ കിട്ടാതിരിക്കാന്‍ കാരണമായി ചൂണ്ടിക്കാട്ടപ്പെടുന്നത്.
ഉയര്‍ന്ന ജോലി, സൗന്ദര്യം തുടങ്ങിയ നിബന്ധനകള്‍ പെണ്‍കുട്ടികള്‍ ശക്തമാക്കിയതോടെ കൂലിപ്പണിക്കാരും നിര്‍മാണ തൊഴിലാളികളും ഉള്‍പ്പെടെയുള്ള യുവാക്കള്‍ക്കു വധുവിനെ കിട്ടാതായി. ഇത്തരം വിഷയങ്ങള്‍ ചര്‍ച്ച ചെയ്യാനും പെണ്‍കുട്ടികളില്‍ ഭാവി ജീവിതത്തെയും ദാമ്പത്യ ജീവിതത്തെയും കുറിച്ച് അവബോധം ഉണ്ടാക്കാനുമാണു കുടുംബശ്രീ സി.ഡി.എസ് സംഗമം ഒരുക്കുന്നത്.
18ന് ആരംഭിക്കുന്ന വാര്‍ഷികാഘോഷങ്ങളുടെ ഭാഗമായി 23നാണു 'പുര നിറഞ്ഞ' പുരുഷന്മാരുടെ സംഗമം നടക്കുക. പഞ്ചായത്തിലേയും സമീപ പ്രദേശങ്ങളിലേയും അവിവാഹിതരായ പുരുഷന്മാര്‍ പരിപാടിയില്‍ സംബന്ധിക്കും.