റിയാദ്: സൗദി മന്ത്രിസഭയില്‍ ചെറിയ പുനഃസംഘടന നടത്തി ഭരണാധികാരിയായ സല്‍മാന്‍ രാജാവ്. മന്ത്രിസഭയിലും വിവിധ ഉന്നത സര്‍ക്കാര്‍ പദവികളിലുമാണ് മാറ്റങ്ങള്‍ വരുത്തി ശനിയാഴ്ച രാജകീയ ഉത്തരവുകള്‍ പുറപ്പെടുവിച്ചത്.
വ്യവസായ ധാതുവിഭവ മന്ത്രിയായിരുന്ന ബന്ദര്‍ അല്‍ഖുറൈഫിനെ ആ സ്ഥാനത്തുനിന്ന് മാറ്റി. പകരം നിലവില്‍ ഊര്‍ജ മന്ത്രിയായ പ്രിന്‍സ് അബ്ദുല്‍ അസീസ് ബിന്‍ സല്‍മാനെ വ്യവസായധാതുവിഭവ മന്ത്രിയുടെ അധിക ചുമതലയും ഏല്‍പ്പിച്ചു. ഇതോടെ ഊര്‍ജ മന്ത്രാലയത്തിനൊപ്പം വ്യവസായ മന്ത്രാലയത്തിന്റെയും ചുമതല അദ്ദേഹം വഹിക്കും.

ബന്ദര്‍ അല്‍ഖുറൈഫിനെ മന്ത്രിസഭാംഗമായ സ്റ്റേറ്റ് മന്ത്രിയായി നിയമിച്ചു. സൈനിക വ്യവസായ ജനറല്‍ അതോറിറ്റിയുടെ ഗവര്‍ണറുടെ സ്ഥാനത്തുനിന്ന് എന്‍ജിനീയര്‍ അഹമ്മദ് അല്‍ ഉഹാലിയെ ഒഴിവാക്കിയതിനെ തുടര്‍ന്ന്, അതിന്റെ ആക്ടിങ് ഗവര്‍ണറുടെ അധിക ചുമതലയും അല്‍ഖുറൈഫിന് നല്‍കി.
മറ്റ് രാജകീയ ഉത്തരവുകള്‍ പ്രകാരം ഡെപ്യൂട്ടി പബ്ലിക് പ്രോസിക്യൂട്ടറായിരുന്ന ഷലാന്‍ അല്‍ഷലാനെ ആ സ്ഥാനത്തുനിന്ന് മാറ്റി റോയല്‍ കോര്‍ട്ടിലെ ഉപദേഷ്ടാവായി നിയമിച്ചു.

ഇതുകൂടാതെ, ഇഹ്‌സാന്‍ ബഫഖീഹിനെ ജിദ്ദ മേയറായും ഡോ. മുഹമ്മദ് അല്‍മുത്‌ലഖിനെ നീതിന്യായ മന്ത്രാലയത്തിന്റെ ഡെപ്യൂട്ടി മന്ത്രിയായും നിയമിച്ചു. തലാല്‍ അല്‍ഹമൂദിനെ സൗദി സെന്‍ട്രല്‍ ബാങ്കിന്റെ ടെക്‌നിക്കല്‍ അഫയേഴ്‌സ് ഡെപ്യൂട്ടി ഗവര്‍ണറായും അബ്ദുലിലാഹ് അല്‍ദുഹൈമിനെ എക്‌സിക്യൂട്ടീവ് അഫയേഴ്‌സ് ഡെപ്യൂട്ടി ഗവര്‍ണറായും നിയമിച്ചിട്ടുണ്ട്.

സര്‍ക്കാര്‍ സംവിധാനത്തിന്റെ കാര്യക്ഷമത വര്‍ധിപ്പിക്കുകയും വിവിധ മേഖലകളിലെ ഭരണനേതൃത്വം കൂടുതല്‍ ശക്തിപ്പെടുത്തുകയും ചെയ്യുന്നതിന്റെ ഭാഗമായാണ് ഈ മാറ്റങ്ങളെന്നാണ് വിലയിരുത്തപ്പെടുന്നത്.

English Summary:
Saudi Arabia has carried out a minor Cabinet reshuffle through a series of royal orders issued by King Salman. Energy Minister Prince Abdulaziz bin Salman has been given additional charge as Minister of Indutsry and Mineral Resources. Former Indutsry Minister Bandar Al-Khorayef has been appointed Minister of State and acting governor of GAMI. Several other senior appointments were also announced.