തൃക്കരിപ്പൂര്‍: പാലക്കാട് റെയില്‍വേ ഡിവിഷനു കീഴില്‍ വരുമാനത്തിന്റെ കാര്യത്തില്‍ മുന്നിലും വികസന കാര്യത്തില്‍ പിന്നിലുമാണ് പേരില്‍ ആദര്‍ശ് ഉള്ള തൃക്കരിപ്പൂര്‍ റെയില്‍വേ സ്റ്റേഷന്‍.
മറ്റു സ്റ്റേഷനുകളില്‍ ലഭിക്കുന്ന സൗകര്യങ്ങളുടെ നാലിലൊന്നു പോലും ഇവിടെയില്ല. നാല് എക്‌സ്പ്രസ് ട്രെയിനുള്‍പെടെ 10 വണ്ടികള്‍ക്ക് ഈ സ്റ്റേഷനില്‍ സ്റ്റോപ്പുണ്ട്. ഇ കാറ്റഗറിയില്‍പെട്ട തൃക്കരിപ്പൂര്‍ സ്റ്റേഷന്‍ കലക്ഷന്റെ കാര്യത്തില്‍ ഡിവിഷനു കീഴിലെ മറ്റു സ്റ്റേഷനുകള്‍ക്ക് ഏറെ മുന്നിലാണ്.
2016 ഫെബ്രുവരിയിലാണ് തൃക്കരിപ്പൂര്‍ റെയില്‍വേ സ്റ്റേഷന്‍ ആദര്‍ശ് സ്റ്റേഷനായി ഉയര്‍ത്തിയതായി പ്രഖ്യാപിച്ചത്. എന്നാല്‍, റെയില്‍വേ സ്റ്റേഷന്‍ ആദര്‍ശായി മാറ്റിയപ്പോള്‍ ജീവനക്കാരുടെ എണ്ണം രണ്ടില്‍ നിന്നു ഒന്നായികുറയുകയായിരുന്നു.
പേരില്‍ മാത്രമാണ് ആദര്‍ശ്. വികസന കാര്യത്തില്‍ എന്നും തൃക്കരിപ്പൂരിന് അവഗണന മാത്രമേ ഉണ്ടായിട്ടുള്ളൂവെന്നാണ് യാത്രക്കാര്‍ പറയുന്നത്. തല്‍ക്കാല്‍ റിസര്‍വേഷന്‍ ഉള്‍പ്പെടെ സൗകര്യമുള്ള ഇ കാറ്റഗറിയില്‍പ്പെട്ട അപൂര്‍വം സ്റ്റേഷനുകളില്‍ ഒന്നാണ് തൃക്കരിപ്പൂര്‍.
ആദര്‍ശ് സ്റ്റേഷനായി പ്രഖ്യാപിക്കപ്പെട്ടെങ്കിലും രണ്ടു വര്‍ഷം കഴിഞ്ഞും മാറ്റങ്ങളൊന്നും ഇവിടെയുണ്ടായില്ല. എഗ്‌മോര്‍ എക്‌സ്പ്രസിന് സ്റ്റോപ്പ് അനുവദിക്കുമെന്ന് അറിയിപ്പ് ഉണ്ടായിരുന്നെങ്കിലും തുടര്‍ നടപടി ഉണ്ടായില്ല.