കണ്ണൂര്‍: സര്‍ക്കാര്‍ ആശുപത്രികളിലെ ഒ.പി ബഹിഷ്‌കരിച്ചുകൊണ്ടുള്ള സമരം ജനങ്ങളോടുള്ള വെല്ലുവിളിയാണെന്ന് ആരോഗ്യമന്ത്രി. ആര്‍ദ്രം പദ്ധതി തകര്‍ക്കാന്‍ ഒരുവിഭാഗം ഡോക്ടര്‍മാര്‍ ശ്രമിക്കുന്നുവെന്നും മന്ത്രി കണ്ണൂരില്‍ വാര്‍ത്താസമ്മേളനത്തില്‍ പറഞ്ഞു. ജനങ്ങളെ വഞ്ചിക്കാനും, ലഭിക്കുന്ന സഹായം ഇല്ലാതാക്കാനും ഒരു കാരണവശാലും സര്‍ക്കാര്‍ അനുവദിക്കില്ല. സമരത്തെ ശക്തമായി നേരിടുമെന്നും മന്ത്രി കൂട്ടിച്ചേര്‍ത്തു.
ആരോഗ്യരംഗം അവശ്യ സര്‍വിസായതിനാല്‍ ഡോക്ടര്‍മാര്‍ക്ക് പണിമുടക്കി സമരം ചെയ്യാന്‍ കഴിയില്ല. ആശുപത്രിയില്‍ വരുന്ന രോഗികളോടാണോ ഡോക്ടര്‍മാര്‍ പണിമുടക്കുന്നത്. ഈ സമരത്തെ എന്തു ചെയ്യണമെന്ന് ജനങ്ങള്‍ ആലോചിക്കണം. ഇത്തരം രീതിയില്‍ സമരം ചെയ്യുന്ന ഡോക്ടര്‍മാര്‍ക്കെതിരേ ജനങ്ങളുടെ പിന്തുണയോടുകൂടി ശക്തമായ നടപടി സ്വീകരിക്കും.
ജനങ്ങളോട് പ്രതിബദ്ധതയുള്ള എല്ലാ ഡോക്ടര്‍മാരും ജോലിക്ക് ഹാജരായിട്ടുണ്ട്. കുടുംബാരോഗ്യ കേന്ദ്രങ്ങളില്‍ ഒ.പി സമയം ദീര്‍ഘിപ്പിച്ചെങ്കിലും ഡോക്ടര്‍മാരുടെ പ്രവൃത്തി സമയം കൂട്ടിയിട്ടില്ല. കുടുംബാരോഗ്യ കേന്ദ്രത്തില്‍ കിടത്തി ചികിത്സയുമില്ല.
ഡോക്ടറും നഴ്‌സുമില്ലാത്ത ഒരു പി.എച്ച്.സിയിലും കുടുംബാരോഗ്യ കേന്ദ്രം പ്രഖ്യാപിക്കുകയോ വൈകുന്നേരത്തെ ഒ.പി നിര്‍ബന്ധമാക്കുകയോ ചെയ്തിട്ടില്ല. ചിലര്‍ക്കെങ്കിലും, കുടുംബാരോഗ്യ കേന്ദ്രത്തില്‍ വൈകുന്നേരത്തെ ഒ.പി നടത്തിയാല്‍ വീട്ടില്‍ നടത്തുന്ന സ്വകാര്യ ചികിത്സയ്ക്ക് തടസം നേരിടുമോ എന്ന ഭയമുണ്ടെന്നാണ് കരുതുന്നതെന്നും മന്ത്രി കൂട്ടിച്ചേര്‍ത്തു.