ആലക്കോട്: ഓവുചാലുകള്‍ അടഞ്ഞതോടെ ആലക്കോട് ബസ് സ്റ്റാന്റില്‍ മണ്ണ് അടിഞ്ഞുകൂടുന്നു. മാലിന്യം നിറഞ്ഞ ഓവുചാലുകള്‍ ശുചിയാക്കാത്തതിനാല്‍ ചെറിയ മഴ പെയ്താല്‍ പോലും ടാറിങ് നടത്തിയ ഭാഗങ്ങള്‍ മണ്ണ് കൊണ്ട് നിറയുകയാണ്.
ശക്തമായ മഴയില്‍ ഉയര്‍ന്ന പ്രദേശത്ത് നിന്നു മണ്ണും കല്ലും ഒഴുകിയെത്തി ടാര്‍ ചെയ്യുന്ന ഭാഗം മണ്ണിനടിയിലാവുന്ന സ്ഥിതിയാണ്. ഓവുചാലുകളിലെ മാലിന്യം നീക്കാന്‍ നടപടി സ്വീകരിക്കാത്തതാണ് ബസ് സ്റ്റാന്റ് കുളമാകാന്‍ കാരണമെന്ന് വ്യാപാരികള്‍ പറയുന്നു.
ചെറിയ മഴ പെയ്താല്‍ തന്നെ ബസ് കാത്തിരിപ്പ് കേന്ദ്രത്തിനു സമീപത്ത് ചെളി കൂടിക്കിടക്കുന്നത് യാത്രക്കാര്‍ക്ക് ഏറെ ദുരിതമാണ് ഉണ്ടാകുന്നത്. വ്യാപാര സ്ഥാപനങ്ങളിലേക്ക് കടക്കാന്‍ പോലും കല്ലുകള്‍ പെറുക്കി വയ്‌ക്കേണ്ട ഗതികേടിലാണ് വ്യാപാരികള്‍. മാസങ്ങള്‍ക്ക് മുമ്പ് ലക്ഷങ്ങള്‍ ചെലവഴിച്ച് നടത്തിയ ടാറിങ് ഒരു മഴയ്ക്ക് തന്നെ മണ്ണിനടിയിലായിരിക്കുകയാണ്. തുച്ഛമായ തുക ചെലവഴിച്ച് ഓവുചാലുകള്‍ വൃത്തിയാക്കാം എന്നിരിക്കെ അതിന് തയാറാകാത്ത അധികൃതരുടെ നടപടിക്കെതിരേ ജനരോഷം ശക്തമാവുകയാണ്.