തൃശൂര്‍: കേരളത്തില്‍ ലാഭകരമല്ലെന്ന് പറഞ്ഞ് അടച്ചുപൂട്ടിയ സ്‌കൂളുകള്‍ സര്‍ക്കാര്‍ ഏറ്റെടുത്ത് പ്രവര്‍ത്തിപ്പിക്കണമെന്ന് എ.ഐ.എസ്.എഫ് ജില്ലാ സെക്രട്ടറി ശ്യാല്‍ പുതുക്കാട് പറഞ്ഞു. കിരാലൂര്‍ പരശുരാമ മെമ്മോറിയല്‍ സ്‌ക്കൂള്‍ ഉള്‍പ്പെടെ കേരളത്തില്‍ സ്‌ക്കൂളുകള്‍ അടച്ചു പൂട്ടുന്നതിനെതിരേ എ.ഐ.എസ്.എഫ് തൃശൂര്‍ ജില്ലാ കമ്മിറ്റി നടത്തിയ പ്രതിഷേധ സമരം ഉദ്ഘാടനം ചെയ്ത് സംസാരിക്കുകയായിരുന്നു ശ്യാല്‍ പുതുക്കാട്.
പാവപ്പെട്ട വിദ്യാര്‍ഥികള്‍ക്ക് വിദ്യാഭ്യാസം നേടാനുള്ള അവസരം നിഷേധിക്കപ്പെടരുത്. എല്‍.ഡി.എഫ് സര്‍ക്കാര്‍ സുപ്രീം കോടതിയെ സമീപിച്ചതും വിദ്യാഭ്യാസ മന്ത്രിയുടെ നിലപാടും സ്വാഗതര്‍ഹമാണ്. വിദ്യാഭ്യാസത്തില്‍ ലാഭ നഷ്ട കണക്കുകള്‍ നിരത്തി സ്‌ക്കൂള്‍ നിര്‍ത്തുന്നത് കേരളത്തിന്റെ പാരമ്പര്യത്തിന് ചേര്‍ന്നതല്ല.
മാനേജ്‌മെന്റുകള്‍ ഭൂമിയിലുള്ള ലാഭം കണ്ടുകൊണ്ടാണ് സ്‌ക്കൂളുകള്‍ അടച്ചു പൂട്ടുവാന്‍ തിടുക്കം കാണിക്കുന്നത്. അതിന് കോടതികള്‍ പിന്തുണ നല്‍കുകയും ചെയ്യുന്നത് അംഗീകരിക്കാനാവില്ല. കോടതികള്‍ സാധാരണക്കാരുടെ പ്രയാസങ്ങളും മനസിലാക്കണം.  സ്വകാര്യ മാനേജമെന്റ് സ്‌ക്കൂളുകള്‍ നടത്തുന്ന വിദ്യാഭ്യാസ കച്ചവടം കാണാതെ പോവരുത്. അത്തരം സ്‌ക്കൂളുകളില്‍ പോയി പഠിക്കുവാന്‍ സാധാരണ വിദ്യാര്‍ഥികള്‍ക്ക് ആവില്ല. പണമുള്ളവന് മാത്രം വിദ്യാഭ്യാസം എന്ന നിലവാരത്തിലേക്ക് കേരളം മാറുന്നത് ആശങ്കാജനകമാണ്. പൊതു വിദ്യാഭ്യാസവും വിദ്യാലയങ്ങളും സംരക്ഷിക്കുവാന്‍ ഏതറ്റം വരെയുള്ള പോരാട്ടങ്ങള്‍ക്കും എ.ഐ.എസ്.എഫ് നേതൃത്വം നല്‍കുമെന്നും ശ്യാല്‍ പുതുക്കാട് പറഞ്ഞു.
ജില്ലാ വൈസ് പ്രസിഡന്റ് വി.എസ് ഫാസില്‍ അധ്യക്ഷനായി. സംസ്ഥാന കമ്മിറ്റി അംഗങ്ങളായ സുബിന്‍ നാസര്‍, എന്‍.കെ സനല്‍കുമാര്‍ സംസാരിച്ചു. പ്രകടനത്തിന് ചിന്നു ചന്ദ്രന്‍, കെ.വി ജിതിന്‍, വിഷ്ണു സുഗതന്‍, വിഷ്ണു.വി.യു, കീര്‍ത്തി.കെ.ആര്‍, രാകേഷ് കെ.ആര്‍, ജിഷ്ണു.കെ.യു എന്നിവര്‍ നേതൃത്വം നല്‍കി.