പേരൂര്‍ക്കട: പി.ടി.എയും അധ്യാപകരും മറ്റു ഭൗതിക സൗകര്യങ്ങളും കൂടിച്ചേര്‍ന്നപ്പോള്‍ മികവിന്റെ പാതയിലൂടെ മുന്നേറുകയാണ് ഒരു സര്‍ക്കാര്‍ സ്‌കൂള്‍.
അധ്യാപകരുടെയും അനധ്യാപകരുടെ ഒരുപോലെയുള്ള പ്രവര്‍ത്തനം ഇതിന് സഹായകമാകുന്നു. കുറവന്‍കോണത്തെ പട്ടം താണുപിള്ള മെമ്മോറിയല്‍ ഗവ. യു.പി.എസ് ആണ് വികസനപാതയിലൂടെ മുന്നേറുന്നത്.
എന്‍വെസ്റ്റ് നെറ്റ് എന്ന സ്വകാര്യസ്ഥാപനം സ്റ്റുഡന്റ്‌സ് തിയേറ്റര്‍ എന്നുതന്നെ വിശേഷിപ്പിക്കാവുന്ന ഒരു സ്മാര്‍ട്ട് ക്ലാസ്‌റൂം ഒരുക്കിയതാണ് സ്‌കൂളിന് ലഭിച്ച ഏറ്റവും വലിയനേട്ടം.കൂടാതെ ഒന്ന് മുതല്‍ ഏഴ് വരെയുള്ള ക്ലാസുകളില്‍ ഓരോ ക്ലാസ്‌റൂം ലൈബ്രറിക്കുമാവശ്യമായ ബുക്ക് ഷെല്‍ഫ്, വൈറ്റ് ബോര്‍ഡ് എന്നിവ 3.5 ലക്ഷം രൂപ ചെലവിലാണ് നിര്‍മിച്ചു നല്‍കിയത്.
എസ്.എസ്.എയുടെ ഭാഗമായി മൂന്ന് ക്ലാസ് മുറികള്‍, നഗരസഭയുടെ വകയായി, ഷീറ്റിട്ടിരുന്ന മുകള്‍ഭാഗത്ത് സീലിങ്, ഫ്‌ളോറങ് ഇലക്ട്രിഫിക്കേഷന്‍, ക്ലാസ്മുറി വിഭജിക്കല്‍, പ്‌ളാറ്റ്‌ഫോം നിര്‍മിക്കല്‍ എന്നിവ നടന്നുവരുന്നു.
എം.എല്‍.എ ഫണ്ട് ഉപയോഗിച്ച് അടുക്കള, ഭക്ഷണപ്പുര, ഗേറ്റ്, പൂന്തോട്ടം എന്നിവ നിര്‍മിക്കുന്നതിനുള്ള നടപടികളും പുരോഗമിക്കുന്നു. സ്‌കൂളിലെ അക്കാദമിക് പ്രവര്‍ത്തനങ്ങളും മികവുറ്റതാണ്. ശാസ്ത്രഗണിതശാസ്ത്ര മേളകളിലും മറ്റും മികച്ച പ്രവര്‍ത്തനങ്ങള്‍ പുലര്‍ത്താന്‍ സ്‌കൂളിന് സാധിച്ചിട്ടുണ്ട്.
സ്‌കൂളിലെ അധ്യാപക രക്ഷാതര്‍തൃ സമിതിക്ക് കേരളസര്‍ക്കാരിന്റെ ഈവര്‍ഷത്തെ 'മികച്ച പി.ടി.എ' ബഹുമതിയും നേടാനായി.
പി.ടി.എയുടെ നേതൃത്വത്തില്‍ സ്‌കൂള്‍കുട്ടികള്‍ക്ക് ഉച്ചഭക്ഷണത്തിനാവശ്യമായ ജൈവ പച്ചക്കറികൃഷി നടത്തുകയും മികച്ച വിളവെടുപ്പ് നേടുകയും ചെയ്തിട്ടുണ്ട്.