കണ്ണൂര്‍: പെട്രോളിയം നിറച്ച ടാങ്കര്‍ ലോറിയേക്കാള്‍ അപകടം കാലിയായ ടാങ്കര്‍ ലോറിയാണെന്ന് ബിപിസിഎല്‍ മാനേജര്‍ പി.കെ പത്മനാഭന്‍. കാലിയായ ടാങ്കര്‍ ലോറിയില്‍ ബാഷ്പീകരിച്ച പെട്രോള്‍ ഉണ്ടാവും. ഇത് ദ്രവ പെട്രോളിനേക്കാള്‍ തീപിടിത്തം ഉണ്ടാക്കുമെന്നും അദ്ദേഹം പറഞ്ഞു.
കാലി ടാങ്കറിലേക്ക് മൊബൈല്‍ ഫോണ്‍ ടോര്‍ച്ച് തെളിച്ച ഡ്രൈവര്‍ തീപിടിച്ച് മരിച്ച സംഭവവും അദ്ദേഹം വിശദീകരിച്ചു. അപകടകരമായ രാസവസ്തുക്കളെക്കുറിച്ചും രാസദുരന്തമുണ്ടായാല്‍ കൈക്കൊള്ളേണ്ട പ്രതിരോധ പ്രവര്‍ത്തനങ്ങളെക്കുറിച്ചും ഫാക്ടറീസ് ആന്‍ഡ് ബോയിലേഴ്‌സ് വകുപ്പ് സംഘടിപ്പിച്ച ക്ലാസില്‍ സംസാരിക്കുകയായിരുന്നു അദ്ദേഹം. പെട്രോള്‍ ടാങ്കര്‍ ലോറി മറിഞ്ഞാല്‍ പൊതുജനങ്ങള്‍ സമീപിക്കാന്‍ അനുവദിക്കരുത്. അപകടം നടന്നാലുടന്‍ ജനങ്ങളെ ഒഴിപ്പിക്കണം. പെട്രോള്‍ ശേഖരിക്കാനും മറ്റുമായി ആള്‍ക്കാര്‍ ഓടിക്കൂടിയാല്‍ തീപ്പിടിത്തത്തിനും വന്‍ ദുരന്തത്തിനും കാരണമാവും. ടാങ്കര്‍ ലോറികളില്‍ കുറഞ്ഞത് രണ്ട് ഡ്രൈവര്‍മാര്‍ ഉണ്ടായിരിക്കണം. ഇവര്‍ക്ക് പരിശീലനവും നല്‍കിയിരിക്കണം. ടാങ്കര്‍ കാബിനില്‍ ജീവനക്കാര്‍ മാത്രമമേ ഉണ്ടായിരിക്കാവൂ.
അപകടം കാണുന്നയാള്‍ കഴിയുന്നതും വേഗം പൊലീസ്, അഗ്‌നിശമന സേന തുടങ്ങിയവരെ വിവരം അറിയിക്കണം. കാബിനില്‍ ട്രാന്‍സ്‌പോര്‍ട്ട് എമര്‍ജന്‍സി കാര്‍ഡ് (ട്രെം കാര്‍ഡ്) സൂക്ഷിച്ചിരിക്കും. ഇതില്‍ അപകടമുണ്ടായില്‍ അടിയന്തിരമായി ബന്ധപ്പെടേണ്ട നമ്പര്‍ ഉണ്ടായിരിക്കും. മുന്നറിയിപ്പു സംവിധാനങ്ങളായ എമര്‍ജന്‍സി പാനല്‍, ക്ലാസ് ലേബല്‍ എന്നിവയില്‍ നോക്കി ഏത് ഉത്പന്നമാണ് വാഹനത്തില്‍ എന്ന് മനസ്സിലാക്കുക. വിഷവാതകമാണോ തീ പിടിക്കുന്ന വാതകമാണോ എന്ന് മനസ്സിലാക്കുക. ചോര്‍ച്ചയുണ്ടെങ്കില്‍ കാറ്റിന്റെ ദിശ മനസ്സിലാക്കി അതിന് എതിര്‍ ദിശയിലേക്ക് സുരക്ഷിതമായി വേഗം നടക്കുക.
ഓടാന്‍ പാടില്ല.
പരിശീലനം ലഭിച്ച ആളുടെ മേല്‍നോട്ടത്തില്‍ മാത്രമേ ഇത്തരം അപകടങ്ങളില്‍ രക്ഷാപ്രവര്‍ത്തനത്തിന് ശ്രമിക്കാവൂ. ചോര്‍ന്ന വസ്തു തീ പിടിക്കാന്‍ സാധ്യത ഉള്ളതാണെങ്കില്‍ വാഹനത്തിന്റെ അടുത്ത് തീപ്പൊരി ഉണ്ടാവാന്‍ സാധ്യതയുള്ളതെല്ലാം പരമാവധി ഒഴിവാക്കുക. സാധ്യമെങ്കില്‍ വൈദ്യുതി ബന്ധം വിച്ഛേദിക്കുക. മൊബൈല്‍ ഫോണ്‍ ഉപയോഗം കര്‍ശനമായി ഒഴിവാക്കണം. വൈദ്യുത ഉപകരണങ്ങള്‍, സ്റ്റൗവ് മുതലായവ ഓഫാക്കി സൂക്ഷിക്കുക. അപകട മേഖലയില്‍ കാഴ്ചക്കാരെ ഒഴിവാക്കി സുരക്ഷാവലയം ഉണ്ടാക്കണം. വാതകം തീപിടിക്കാതിരിക്കാന്‍ പുറത്തേക്ക് വരുന്ന വാതകം പരമാവധി വെള്ളം ഉപയോഗിച്ച് തണുപ്പിക്കുകയും നിര്‍വീര്യമാക്കുകയും വേണം. ചോരുന്നത് അമോണിയ ആണെങ്കില്‍ നന്നായി നച്ച ടൗവല്‍ മുഖത്തിടുകയും നച്ച ടൗവല്‍ കൊണ്ട് മുഖം തുടക്കുകയും ചെയ്യുന്നത് സുരക്ഷിതമാണ്. ജലം അമോണിയയെ ആഗിരണം ചെയ്യുന്നതിനാല്‍ അപകട സാധ്യത കുറയും.
അതേസമയം, ദ്രവരൂപത്തിലുള്ള അമോണിയ പുറത്തുവരുന്നത് അപകട സാധ്യത കൂട്ടും. ദ്രാവക രൂപത്തില്‍ പുറത്തുവന്നാല്‍ അമോണിയ 850 മടങ്ങ് വാതകമായി പരിവര്‍ത്തനം ചെയ്യപ്പെടും. അമോണിയ തീപിടിക്കാന്‍ സാധ്യത കുറവാണ്. അതേസമയം, സള്‍ഫ്യൂരിക്കാസിഡ് ആണെങ്കില്‍ അതിലേക്ക് ഒരു കാരണവശാലും വെള്ളം ഒഴിക്കാന്‍ പാടില്ല. ദ്രവീകരണ സ്വഭാവം ഉള്ളതിനാല്‍ ഇതുമായി എല്ലാ വിധ ശാരീരിക സമ്പര്‍ക്കവും ഒഴിവാക്കുക. ബാഷ്പം ശ്വസിക്കരുത്. സമ്പര്‍ക്കമുണ്ടായ ശരീര ഭാഗത്ത് വെള്ളം ഉപയോഗിച്ച് കഴുകുക. സള്‍ഫ്യൂരിക്കാസിഡ് ദ്രാവക രൂപത്തിലോ ബാഷ്പ രൂപത്തിലോ ശരീരത്തില്‍ കടന്നാല്‍ ആന്തരികാവയവങ്ങള്‍ക്ക് ഗുരുതരമായി പൊള്ളലേല്‍ക്കും. ഫാക്ട് കൊച്ചി ഡെപ്യൂട്ടി ജനറല്‍ മാനേജര്‍ ഡോ. കെ. ജയചന്ദ്രനും ക്ലാസെടുത്തു. ജില്ലാ കലക്ടര്‍ മീര്‍ മുഹമ്മദ് അലി, ഫാക്ടറീസ് ആന്‍ഡ് ബോയിലേഴ്‌സ് വകുപ്പ് ഇന്‍സ്‌പെക്ടര്‍ കെ. കണ്ണയ്യന്‍ സംസാരിച്ചു. ഫയര്‍ ആന്‍ഡ് സേഫ്റ്റി വകുപ്പ് ഉദ്യോഗസ്ഥര്‍, വിവിധ ജില്ലാ തല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.