പയ്യന്നൂര്‍: മാതമംഗലത്ത് പടക്ക വ്യാപാര സ്ഥാപനത്തിന് തീപിടിച്ച് വ്യാപക നാശം. മെയിന്‍ റോഡിന് സമീപത്തെ പൈച്ചടത്തില്‍ തമ്പായിയുടെ ഉടമസ്ഥതയിലുള്ള ലക്ഷ്മി പടക്ക വ്യാപാര സ്ഥാപനത്തിലാണ് ഞായറാഴ്ച ഉച്ചയ്ക്ക് 12ഓടെ തീപിടിത്തമുണ്ടായത്. സ്ഥാപനം പ്രവര്‍ത്തിച്ചിരുന്ന മൂന്ന് നില കെട്ടിടത്തിന്റെ താഴത്തെ നിലയും പുറത്ത് നിര്‍ത്തിയിട്ടിരുന്ന ഒരു ബൈക്കും കത്തിനശിച്ചു. തീപിടിച്ചയുടനെ കടയില്‍ ഉണ്ടായിരുന്നവര്‍ പുറത്തേക്ക് ഓടി. സമീപത്തെ കടകളിലേക്ക് തീ പടരാത്തതിനാലും വിഷു ദിനമായതിനാല്‍ മറ്റ് കടകളും ജനങ്ങളും കുറവായതിനാലും വന്‍ ദുരന്തമാണ് ഒഴിവായത്. പയ്യന്നൂരില്‍ നിന്നെത്തിയ അഗ്‌നിശമന സേനാംഗങ്ങളും നാട്ടുകാരും ചേര്‍ന്നാണ് തീ നിയന്ത്രണ വിധേയമാക്കിയത്. ഷോര്‍ട്ട് സര്‍ക്യൂട്ട് ആകാം തീപിടിത്തത്തിന് പിന്നിലെന്നാണ് പ്രാഥമിക നിഗമനമെങ്കിലും പൊലിസ് അന്വേഷണം ഊര്‍ജിതപ്പെടുത്തിയിട്ടുണ്ട്. പടക്ക കട അശ്രദ്ധമായി കൈകാര്യം ചെയ്തതിന് കടയുട പൈച്ചാടത്തില്‍ തമ്പായിക്കെതിരേ പെരിങ്ങോം പൊലിസ് കേസെടുത്തു.