കാസര്‍കോട്: 25 മുതല്‍ 29 വരെ കൊല്ലത്ത് നടക്കുന്ന സി.പി.ഐ 23ാം പാര്‍ട്ടി കോണ്‍ഗ്രസിന്റെ പതാക ജാഥ കയ്യൂരില്‍ നിന്നു 19നു പുറപ്പെടും. 19നു രാവിലെ 9.30നു കയ്യൂര്‍ സമരസേനാനിയും കമ്മ്യൂണിസ്റ്റ് നേതാവുമായിരുന്ന ചൂരിക്കാടന്‍ കൃഷ്ണന്‍ നായരുടെ സ്മൃതി മണ്ഡപത്തില്‍വച്ച് സി.പി.ഐ കേന്ദ്ര സെക്രട്ടേറിയറ്റംഗം പന്ന്യന്‍ രവീന്ദ്രന്‍ ദേശീയ എക്‌സിക്യൂട്ടീവംഗം ബിനോയ് വിശ്വത്തിനു പതാക കൈമാറും. തുടര്‍ന്ന് 11.30ന് നീലേശ്വരത്ത് സ്വീകരണം നല്‍കും. എ.ഐ.ടി.യു.സി സംസ്ഥാന ജനറല്‍ സെക്രട്ടറി കെ.പി രാജേന്ദ്രന്‍, കിസാന്‍സഭ സംസ്ഥാന സെക്രട്ടറി വി. ചാമുണ്ണി, മഹിളാസംഘം സംസ്ഥാന സെക്രട്ടറി അഡ്വ. പി. വസന്തം, എ.ഐ.വൈ.എഫ് സംസ്ഥാന സെക്രട്ടറി മഹേഷ് കക്കത്ത്, സി.പി.ഐ കണ്ണൂര്‍ ജില്ലാ സെക്രട്ടറി പി. സന്തോഷ് കുമാര്‍, മലപ്പുറം ജില്ലാ സെക്രട്ടറി പി.പി സുനീര്‍ എന്നിവര്‍ ജാഥാംഗങ്ങളായിരിക്കും.