തിരുവനന്തപുരം: കത്‌വ, ഉന്നാവോ സംഭവങ്ങളില്‍ പ്രതിഷേധിച്ചും പ്രതികള്‍ക്ക് കടുത്ത ശിക്ഷ ഉറപ്പാക്കണമെന്ന് ആവശ്യപ്പെട്ടും ഇന്ന് എല്ലാ ബൂത്തുകളിലും കോണ്‍ഗ്രസിന്റെ നേതൃത്വത്തില്‍ ജനകീയ പ്രതിഷേധജ്വാല തെളിയിക്കും. പ്രതിഷേധജ്വാലയുടെ ഭാഗമായി മെഴുകുതിരി തെളിയിച്ച് റാലിയും തുടര്‍ന്ന് പൊതുയോഗങ്ങളും നടക്കും.
നരേന്ദ്രമോദി സര്‍ക്കാരിന്റെ ജനദ്രോഹ നടപടികളിലും ദലിത്, ന്യൂനപക്ഷ വിഭാഗങ്ങള്‍ക്കെതിരേയുള്ള അക്രമങ്ങളിലും പ്രതിഷേധിച്ച് എ.ഐ.സി.സിയുടെ നേതൃത്വത്തില്‍ 29ന് രാവിലെ 11 മണിക്ക് ഡല്‍ഹിയിലെ രാംലീല ഗ്രൗണ്ടില്‍ സംഘടിപ്പിക്കുന്ന രാഷ്ട്രീയ റാലിയില്‍ കേരളത്തില്‍ നിന്ന് 500 പ്രതിനിധികള്‍ പങ്കെടുക്കും.
പ്രതിഷേധ റാലി കോണ്‍ഗ്രസ് പ്രസിഡന്റ് രാഹുല്‍ ഗാന്ധി ഉദ്ഘാടനം ചെയ്യുമെന്ന് കെ.പി.സി.സി ജനറല്‍ സെക്രട്ടറി തമ്പാനൂര്‍ രവി അറിയിച്ചു.