പാലക്കാട്: അപ്രഖ്യാപിത ഹര്‍ത്താല്‍ അനുകൂലിയാണെന്ന കുറ്റം ചുമത്തി യൂത്ത് കോണ്‍ഗ്രസ് ഭാരവാഹിക്ക് പൊലിസിന്റെ ക്രൂരമര്‍ദനം. യൂത്ത് കോണ്‍ഗ്രസ് പാലക്കാട് നിയോജക മണ്ഡലം സെക്രട്ടറി മന്‍സൂറിനെയാണ് സൗത്ത് പൊലിസ് ക്രൂരമായി മര്‍ദിച്ചത്. പൊലിസിന്റെ ഈ നടപടിയില്‍ പ്രതിഷേധിച്ച് ഇന്ന് രാവിലെ സി ഐ ഓഫിസിലേക്ക് മാര്‍ച്ച് നടത്തുമെന്ന് ഡി.സി.സി പ്രസിഡന്റ് വി കെ ശ്രീകണ്ഠന്‍ അറിയിച്ചു. യൂത്ത് കോണ്‍ഗ്രസ് ഭാരവാഹിയാണെന്ന് സഹപ്രവര്‍ത്തകരും മന്‍സൂറും അറിയിച്ചിട്ടും പൊലിസ് കസ്റ്റഡിയിലെടുത്ത് ക്രൂരമായി മര്‍ദിക്കുകയായിരുന്നു. മന്‍സൂറിന്റെ നിലവിളി കേട്ട് ഓടിയെത്തിയ സഹപ്രവര്‍ത്തകര്‍ അപേക്ഷിച്ചപ്പോഴാണ് എസ്.ഐയും രണ്ടു പൊലിസുകാരും ചേര്‍ന്ന് ഇദ്ദേഹത്തെ ആശുപത്രിയില്‍ എത്തിച്ചത്. നെഞ്ചത്തും മറ്റും ക്രൂരമായി ചവിട്ടേറ്റ മന്‍സൂര്‍ ജില്ലാ ആശുപത്രിയിലെ അത്യാഹിത വിഭാഗത്തില്‍ ചികിത്സയില്‍ കഴിയുകയാണ്.
ടൗണ്‍ സൗത്ത് സി ഐ മനോജിന്റെ നിര്‍ദ്ദേശാനുസരണമാണ് മന്‍സൂറിനെ കസ്റ്റഡിയിലെടുത്തതെന്നാണ് എസ് ഐയുടെയും മറ്റും വിശദീകരണം. രാഷ്ട്രീയവൈരാഗ്യം തീര്‍ക്കാനായി പൊലിസിനെ കരുവാക്കുകയാണ് ചെയ്യുന്നത്. കുറ്റക്കാരായ പൊലിസുകാര്‍ക്കെതിരെ ശക്തമായ നടപടി സ്വീകരിക്കുന്നതു വരെ പോരാട്ടം തുടരുമെന്നും ഡി.സി.സി പ്രസിഡന്റ് വി.കെ ശ്രീകണ്ഠന്‍ വ്യക്തമാക്കി.