തിരുവനന്തപുരം: യാത്രികനും മറ്റു യാത്രക്കാര്‍ക്കും സുരക്ഷിതയാത്ര എന്ന സന്ദേശവുമായി തിരുവനന്തപുരം കേന്ദ്രീകരിച്ച് പ്രവര്‍ത്തിക്കുന്ന സതേണ്‍ ബ്രദേഴ്‌സ് റൈഡേഴ്‌സ് ക്ലബ് രംഗത്ത്. സുരക്ഷിത യാത്രകളൊരുക്കി സമൂഹത്തിന് നല്ലൊരു സന്ദേശം നല്‍കുക എന്ന ലക്ഷ്യത്തോടെയാണ് ക്ലബ് (എസ്.ആര്‍.ബി.സി)പ്രവര്‍ത്തിക്കുന്നതെന്ന് സെക്രട്ടറി തരുണ്‍രാജ് വാര്‍ത്താസമ്മേളനത്തില്‍ അറിയിച്ചു.
750 സി.സിയോ അതിനുമുകളിലോ ഉള്ള മോട്ടോര്‍ ബൈക്ക് ഉടമകളുടെ റജിസ്‌ട്രേഡ് സംഘടനയാണ് എസ്.ആര്‍.ബി.സി. യാത്രയിലും റോഡിലും അച്ചടക്കം, കൃത്യനിഷ്ഠ, റോഡുസുരക്ഷ, മറ്റു യാത്രക്കാരോട് കരുതലും സുരക്ഷയും ഗതാഗത നിയമങ്ങളുടെ കൃത്യമായ പാലനം, ഹെല്‍മറ്റ് ധരിക്കുക, യാത്ര ചെയ്യവെ മൊബൈല്‍ ഫോണ്‍ ഉപയോഗിക്കാതിരിക്കുക, നിയന്ത്രിത വേഗം പാലിക്കുക എന്നിവക്ക് അനുസൃതമായാണ് എസ്.ആര്‍.ബി.സിയുടെ യാത്രകള്‍. മറ്റു യാത്രക്കാരിലേക്ക് റോഡ് സുരക്ഷയെക്കുറിച്ച് സന്ദേശം എത്തിക്കുകയാണ് ലക്ഷ്യം.
സാന്ത്വനം നല്‍കാനായ് വേഗത കുറക്കൂ എന്ന സന്ദേശവുമായി ഹ്രസ്വചിത്രവും ഇവര്‍ തയാറാക്കിയിട്ടുണ്ട്. ഈ മാസം 21ന് കഠിനംകുളം ലേക്പാലസ് ഹോട്ടലില്‍ ട്രാഫിക് ഡി.സി.പി ജയദേവ് ലോ ഇതിന്റെ ഉദ്ഘാടനം നിര്‍വഹിക്കും.