ചെന്നെെ: തമിഴ്‌നാട്ടിലെ ശിവഗംഗയില്‍ മോഷണം ആരോപിച്ച് പൊലിസ് കസ്റ്റഡിയിലെടുത്ത യുവാവിനെ മരിച്ച നിലയില്‍ കണ്ടെത്തി. ശിവഗംഗ മഡപ്പുറം കാളിയമ്മന്‍ ക്ഷേത്രത്തിലെ കരാര്‍ ജീവനക്കാരനായ ബി അജിത് കുമാര്‍ (27) ആണ് മരിച്ചത്. സംഭവത്തില്‍ തിരുപ്പുവനം പൊലിസ് സ്റ്റേഷനിലെ 6 പൊലിസുകാരെ സസ്‌പെന്റ് ചെയ്തു. ക്ഷേത്ര ദര്‍ശനത്തിനെത്തിയ യുവതി നല്‍കിയ പരാതിയിലാണ് പൊലിസ് യുവാവിനെ കസ്റ്റഡിയിലെടുത്തത്. 

അമ്മയ്‌ക്കൊപ്പം ക്ഷേത്രത്തിലെത്തിയതായിരുന്നു പരാതിക്കാരിയായ മധുര സ്വദേശി നികിത. ക്ഷേത്രത്തിനടുത്ത് വെച്ച് കാറിന്റെ താക്കോല്‍ അജിത്തിനെ ഏല്‍പ്പിച്ചെന്നും, തിരിച്ചുവന്നപ്പോള്‍ ബാഗിലുണ്ടായിരുന്ന ഒന്‍പതര പവന്‍ സ്വര്‍ണ്ണാഭരണങ്ങള്‍ കാണാനില്ലായിരുന്നുവെന്നും ഇവര്‍ പരാതിയില്‍ ആരോപിച്ചു. പിന്നാലെ പൊലിസ് സംഘം അജിതിനെ കസ്റ്റഡിയിലെടുക്കുകയായിരുന്നു. സംഭവത്തില്‍ തനിക്ക് പങ്കില്ലെന്ന് അജിത് ആവര്‍ത്തിച്ച് പറഞ്ഞെങ്കിലും പൊലിസ് വിശ്വസിച്ചില്ല. പൊലിസ് വാനില്‍വെച്ച് അജിതിനെ പൊലിസ് സംഘം ക്രൂരമായി മര്‍ദ്ദിച്ചെന്നാണ് കുടുംബത്തിന്റെ ആരോപണം. സ്റ്റേഷനില്‍ എത്തുന്നതിന് മുന്‍പ് തന്നെ യുവാവ് മരിച്ചെന്നും ആരോപണമുണ്ട്. 

ALSO READ: ഇതാണ് സുവര്‍ണ്ണാവസരം; ഭരണഘടന തിരുത്തണമെന്ന ആവശ്യവുമായി അസം മുഖ്യമന്ത്രിയും 

തുടര്‍ന്ന് നാട്ടുകാരുടെ നേതൃത്വത്തില്‍ പൊലിസ് സ്റ്റേഷന് മുന്‍പില്‍ വലിയ പ്രതിഷേധമുണ്ടായി. 6 പൊലിസുകാരെ അന്വേഷണ വിധേയമായി സസ്‌പെന്റ് ചെയ്തിട്ടുണ്ടെന്നും നിഷ്പക്ഷമായ അന്വേഷണം നടക്കുമെന്നും ജില്ല പൊലിസ് മേധാവി അറിയിച്ചു. 

അതേസമയം അജിത് മോഷണം നടത്തിയതിന് തെളിവുകളൊന്നും പൊലിസിന് ലഭിച്ചിട്ടില്ല. മൃതദേഹം നിലവില്‍ രാജാജി സര്‍ക്കാര്‍ ആശുപത്രിയിലേക്ക് മാറ്റിയിട്ടുണ്ട്.  

A 27-year-old man, B. Ajith Kumar, who was a contract staff member at the Madappuram Kaliamman Temple in Sivaganga, was found dead while in police custody. He had been taken into custody by the police following a theft allegation.