ഫിഫ ക്ലബ്‌ ലോകകപ്പിൽ പ്രീ ക്വാർട്ടർ പോരാട്ടങ്ങൾക്കുള്ള തയ്യാറെടുപ്പിലാണ് ഇന്റർ മയാമി. പ്രീ ക്വാർട്ടറിൽ ഇന്ന് നടക്കുന്ന മത്സരത്തിൽ ഫ്രഞ്ച് ക്ലബ് പിഎസ്ജിയെയാണ് ഇന്റർ മയാമി നേരിടുക. ഈ മത്സരത്തിൽ മെസിക്ക് ഒരു തകർപ്പൻ റെക്കോർഡും സ്വന്തമാക്കാൻ സാധിക്കും.

ഫിഫ ക്ലബ് ലോകകപ്പിന്റെ ഏറ്റവും മികച്ച ഗോൾ വേട്ടക്കാരനായി മാറാനുള്ള അവസരമാണ് മെസിയുടെ മുന്നിൽ ഉള്ളത്. ഇതിനായി മെസിക്ക് വേണ്ടത് വെറും രണ്ട് ഗോൾ മാത്രമാണ്. ഇതിനോടകം തന്നെ മെസി ആറ് ഗോളുകളാണ് ടൂർണമെന്റിൽ നേടിയിട്ടുള്ളത്. ഏഴ് ഗോളുകൾ നേടിയ പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോയാണ് ഈ നേട്ടത്തിൽ ഒന്നാം സ്ഥാനത്തുള്ളത്. അതുകൊണ്ടുതന്നെ രണ്ടു ഗോളുകൾ കൂടി നേടിയാൽ റൊണാൾഡോയെ മറികടന്നുകൊണ്ട് ഒന്നാം സ്ഥാനത്തേക്ക് മുന്നേറാൻ ഇന്റർ മയാമി നായകന് സാധിക്കും. 

 ഗ്രൂപ്പ് ഘട്ടത്തിൽ ഒരു വിജയവും രണ്ട് സമനിലയും അടക്കം അഞ്ചു പോയിന്റ് സ്വന്തമാക്കിയാണ് മയാമി അടുത്ത റൗണ്ടിലേക്ക് മുന്നേറിയത്. പോർച്ചുഗീസ് ക്ലബ്ബായ പോർട്ടോ എഫ്സിക്കെതിരെയായിരുന്നു ഇന്റർ മയാമി വിജയിച്ചത്. ഈ മത്സരത്തിൽ ഇന്റർ മയാമിക്കായി വിജയഗോൾ നേടിയത് മെസിയായിരുന്നു. പോർച്ചുഗീസ് ടീമിനെതിരെ ഒരു തകർപ്പൻ ഫ്രീ കിക്ക് ഗോളിലൂടെയാണ് മെസി ഇന്റർ മയാമിക്ക് വിജയം സമ്മാനിച്ചത്.

ഗ്രൂപ്പ് ഘട്ടത്തിലെ മറ്റു രണ്ടു മത്സരങ്ങളും സമനിലയിൽ പിരിയുകയായിരുന്നു. ആഫ്രിക്കൻ ക്ലബ്ബായ അൽ അഹ്ലിക്കെതിരെ ഗോൾ രഹിത സമനിലയായിരുന്നു ഇന്റർ മയാമി വഴങ്ങിയിരുന്നത്. അവസാന മത്സരത്തിൽ ബ്രസീലിയൻ ക്ലബ്ബ് പാൽമിറാസിനെതിരെ 2-2 എന്ന സ്കോർ ലൈനിലാണ് മയാമി സമനില നേടിയത്.

Lionel Messi Need Two Goals To Break Cristiano Ronaldo Record in Fifa Club World Cup