നിലമ്പൂര്‍: ഇ-പോസ് യന്ത്രം സ്ഥാപിച്ചതോടെ റേഷന്‍ കടകളില്‍ അരിയുള്‍പ്പെടെ കിട്ടാതെ കാര്‍ഡുടമകള്‍ വലയുന്നു. ഇന്റര്‍നെറ്റ് തകരാറുകളും നെറ്റ് വര്‍ക്കില്ലാത്തതുമാണ് റേഷന്‍ വിതരണം തടസപ്പെടാനിടയാക്കുന്നത്. ആഴ്ചാവസാനമായ ഇന്നലെ റേഷന്‍ കടകളില്‍ എത്തിയവര്‍ അരി കിട്ടാതെ നിരാശരായി മടങ്ങി.
കംപ്യൂട്ടര്‍ ബില്ലായതിനാലാണ് വിതരണം തടസപ്പെട്ടത്. എഴുതികൊടുക്കുന്ന ബില്ലായിരുന്നുവെങ്കില്‍ വിതരണം എളുപ്പമായിരുന്നുവെന്ന് കാര്‍ഡുടമകള്‍ പറയുന്നു. കൂടാതെ 70ശതമാനം ആളുകളുടേയും ആധാര്‍ റേഷന്‍ കാര്‍ഡ് ലിങ്കായിട്ടുമില്ല. കാര്‍ഡില്‍ പേരുള്ള വൈകല്യമുള്ളവരാണെങ്കില്‍ അവര്‍ തന്നെ റേഷന്‍ കടയിലെത്തി വേണം അരിയും മറ്റു സാധനങ്ങളും വാങ്ങാന്‍.
കാര്‍ഡുടമകളുടെ ക്ഷമപരീക്ഷിക്കുകയാണ് അധികൃതര്‍. നെറ്റ് വര്‍ക്ക് വന്നാല്‍ തന്നെ ബില്ലടിക്കാനുള്ള സാങ്കേതിക തടസങ്ങള്‍ വേറെയാണ്. ഇ-പോസ് യന്ത്രം സ്ഥാപിച്ചെങ്കിലും ഇന്റര്‍നെറ്റ് സൗകര്യമില്ലാതെ 59 റേഷന്‍ കടകളുണ്ട്. ഇ-പോസ് യന്ത്രത്തില്‍ ചേര്‍ക്കാത്തമൂലം ആദിവാസി മേഖലയിലെ കടകളില്‍ കുത്തരി വിതരണം ചെയ്യുന്നില്ല. അധിക റേഷന്‍ കടകളിലും പച്ചരി മാത്രമേയുള്ളു.
ഓരോ തവണയും അരി എത്തുമ്പോള്‍ എത്തുമ്പോള്‍ അതു വാങ്ങാന്‍ കാര്‍ഡ് ഉടമ വീണ്ടും കടയിലെത്തണമെന്നതും ഇവരെ ബുദ്ധിമുട്ടിക്കുകയാണ്. നിലമ്പൂര്‍ താലൂക്കില്‍ 225 റേഷന്‍ കടകളാണുള്ളത്. കഴിഞ്ഞ 11ഓടുകൂടി എല്ലാ കടകളിലും ഇ-പോസ് യന്ത്രങ്ങള്‍ സ്ഥാപിച്ചു. ഗോഡൗണുകളില്‍നിന്ന് സാമഗ്രികള്‍ കടകളില്‍ എത്തിച്ച് തൂക്കി നല്‍കണമെന്ന് റീട്ടെയില്‍ വ്യാപാരികള്‍ നിര്‍ബന്ധം പിടിച്ചതിനെ തുടര്‍ന്നുണ്ടായ തര്‍ക്കം മൂലം ഗോഡൗണില്‍ നിന്നുള്ള വിതരണം നീണ്ടുപോയിരുന്നു. തര്‍ക്കത്തെിനൊടുവില്‍ ചൊവ്വാഴ്ചയാണ് കടകളിലേക്ക് അരിയെത്തി തുടങ്ങിയത്. അതേ സമയം എല്ലാ കടകളിലേക്കും അരി മുഴുവനായും വിതരണത്തിനെത്തിയിട്ടുമില്ല.