ജയ്പൂര്‍: വിജയ പരാജയങ്ങള്‍ മാറിമറിഞ്ഞ പോരാട്ടത്തില്‍ രാജസ്ഥാന്‍ റോയല്‍സിന് നാടകീയ വിജയം. മുംബൈ ഇന്ത്യന്‍സിനെ അവര്‍ മൂന്ന് വിക്കറ്റിന് വീഴ്ത്തി. അവസാന ഘട്ടത്തില്‍ ആഞ്ഞടിച്ച കൃഷ്ണപ്പ ഗൗതമിന്റെ ബാറ്റിങാണ് കൈവിട്ട മത്സരം രാജസ്ഥാന് അനുകൂലമാക്കിയത്. താരം 11 ബോളില്‍ രണ്ട് സിക്‌സും നാല് ഫോറും സഹിതം33 റണ്‍സെടുത്ത് പുറത്താകാതെ നിന്ന് താരമായി.
ആദ്യം ബാറ്റ് ചെയ്ത മുംബൈ ഏഴ് വിക്കറ്റിന് 167 റണ്‍സെടുത്തപ്പോള്‍ രാജസ്ഥാന്‍ ഏഴ് വിക്കറ്റ് നഷ്ടത്തില്‍ 168 റണ്‍സെടുത്താണ് വിജയിച്ചത്.
വിജയം തേടിയിറങ്ങിയ രാജസ്ഥാന്‍ തുടക്കത്തില്‍ പതറി. പിന്നീട് മൂന്നാം വിക്കറ്റില്‍ സഞ്ജു സാംസണും (52), ബെന്‍ സ്റ്റോക്‌സും (40) ചേര്‍ന്ന് രക്ഷാപ്രവര്‍ത്തനം നടത്തി. ഇരുവരും പുറത്തായത് ടീമിന് തിരിച്ചടിയായി.
നേരത്തെ ടോസ് നേടി മുംബൈ ബാറ്റിങ് തിരഞ്ഞെടുക്കുകയായിരുന്നു. തുടക്കത്തില്‍ തന്നെ എവിന്‍ ലൂയീസിനെ നഷ്ടമായെങ്കിലും ഓപണര്‍ സൂര്യകുമാര്‍ യാദവിനൊപ്പം ഇഷാന്‍ കിഷന്‍ ചേര്‍ന്നതോടെ മുംബൈ കുതിച്ചു. ഇരുവരും ചേര്‍ന്ന് രണ്ടാം വിക്കറ്റില്‍ 130 റണ്‍സിന്റെ കൂട്ടുകെട്ടുണ്ടാക്കി. മികച്ച സ്‌കോറിലേക്ക് നീങ്ങവേ ഇരുവരേയും തുടരെ നഷ്ടമായത് മുംബൈയുടെ കുതിപ്പിനെ സാരമായി ബാധിച്ചു. ഒരു ഘട്ടത്തില്‍ സ്‌കോര്‍ 200 കടക്കുമെന്ന പ്രതീതിയുണ്ടായി. സൂര്യകുമാര്‍ 47 പന്തില്‍ ആറ് ഫോറും മൂന്ന് സിക്‌സും സഹിതം 72 റണ്‍സും ഇഷാന്‍ 42 പന്തില്‍ നാല് ഫോറും മൂന്ന് സിക്‌സും സഹിതം 58 റണ്‍സും കണ്ടെത്തി. പിന്നീട് തുടരെ തുടരെ വിക്കറ്റുകള്‍ നഷ്ടമായത് മുംബൈയ്ക്ക് തിരിച്ചടിയായി. പൊള്ളാര്‍ഡ് 21 റണ്‍സുമായി പുറത്താകാതെ നിന്നു.
ജോഫ്രെ ആര്‍ച്ചറുടെ മാരക ബൗളിങാണ് മുംബൈ വാലറ്റത്തെ കശക്കിയത്. താരം നാലോവറില്‍ 22 റണ്‍സ് മാത്രം വഴങ്ങി മൂന്ന് വിക്കറ്റുകള്‍ വീഴ്ത്തി. ധവാല്‍ കുല്‍ക്കര്‍ണി രണ്ട് വിക്കറ്റുകളെടുത്തു.