പെരുവള്ളൂര്‍: അജ്ഞാതരോഗം പിടിപെട്ട് ആടുകള്‍ ചത്തൊടുങ്ങിയിട്ടും അധികൃതര്‍ മൗനം പാലിക്കുന്നതായി ആരോപണം. പാലപെട്ടിപ്പാറ, ഇരുമ്പന്‍ കുടുക്ക് ഭാഗങ്ങളില്‍ മാത്രം ഒരു മാസത്തിനിടയില്‍ അജ്ഞാത രോഗത്താള്‍ പത്തോളം ആടുകള്‍ ചത്തതായാണ് നാട്ടുകാരില്‍ നിന്നും ലഭിച്ച വിവരം. സംഭവം അധികൃതരുടെ ശ്രദ്ധയില്‍ പെടുത്തിയിട്ടും അധികൃതര്‍ വേണ്ടത്ര ഗൗരവത്തിലെടുത്തില്ലെന്ന പരാതിയാണ് ഉയരുന്നത്്. എന്നാല്‍ ഇതുമായി ബന്ധപ്പെട്ട് ആവശ്യമായ നടപടികള്‍ സ്വീകരിച്ച് വരുന്നതായും ശ്വാസകോശ സംബന്ധമായ അസുഖങ്ങള്‍ ബാധിച്ച ആടുകള്‍ക്ക് ചികിത്സ നല്‍കിയിരുന്നതായും മൂന്ന് ആടുകള്‍ ചത്തതായാണ് ഔദ്യോഗിക വിവരം ലഭിച്ചതെന്നുമാണ് പെരുവള്ളൂര്‍ മൃഗാശുപത്രിയില്‍ നിന്നും ലഭിക്കുന്ന വിവരം.