ചെര്‍ക്കള: ചെര്‍ക്കള ഖുവ്വത്തുല്‍ ഇസ്‌ലാം മദ്‌റസയിലേക്കുള്ള വഴി പൂര്‍ണമായും വില്ലേജ് ഓഫിസ് അധികൃതര്‍ അടച്ചു.
ചെര്‍ക്കള വില്ലേജ് ഓഫിസിനരികല്‍കൂടി വിദ്യാര്‍ഥികള്‍ മദ്‌റസയിലേക്കു നടന്നു പോവുന്ന വഴിയാണു കഴിഞ്ഞ ദിവസം പൂര്‍ണമായും അടച്ചത്. ഇതോടെ മദ്‌റസയിലെത്തേണ്ട നൂറോളം വിദ്യാര്‍ഥികള്‍ മറ്റുവഴികള്‍ തേടേണ്ട അവസ്ഥയിലാണ്.
ഒരു മാസം മുന്‍പ് മദ്‌റസയിലേക്കും മറ്റുമുള്ള വഴിയടച്ചു വില്ലേജ് അധികൃതര്‍ മതില്‍കെട്ടി തുടങ്ങിയതാണ്. എന്നാല്‍ നാട്ടുകാരും പരിസരവാസികളും പരാതിയുമായെത്തിയതോടെ തഹസില്‍ദാര്‍ മതില്‍ നിര്‍മിക്കുന്നതു നിര്‍ത്തിവെപ്പിച്ചിരുന്നു.
തുടര്‍ന്നു മദ്‌റസയിലേക്കടക്കം വഴിവച്ച് ബാക്കിഭാഗങ്ങളില്‍ മതില്‍ നിര്‍മാണം നടത്തുകയായിരുന്നു. എന്നാല്‍ കഴിഞ്ഞ ദിവസം മുന്നറിയിപ്പില്ലാതെയാണ് മദ്‌റസയിലേക്കുള്ള വഴിയും അടച്ചു മതില്‍ നിര്‍മിച്ചിരിക്കുന്നത്.