ഗസ്സ: ഫലസ്തീനികള്‍ക്ക് നേരെ ഇസ്‌റാഈല്‍ സൈന്യം നടത്തിയ വെടിവയ്പില്‍ പരുക്കേറ്റ കൗമാരക്കാരന്‍ കൊല്ലപ്പെട്ടു. തെക്കന്‍ ഗസ്സയില്‍ നടന്ന പ്രതിഷേധത്തിന്നിടെ വെടിയേറ്റ അസ്സം ഉവൈദ്യ(15)യാണ് ഇന്നലെ മരിച്ചതെന്ന് ആരോഗ്യ മന്ത്രാലയം സ്ഥിരീകരിച്ചു. വെള്ളിയാഴ്ച നടന്ന പ്രതിഷേധത്തിന്നിടെ കൊല്ലപ്പെടുന്ന നാലാമത്തെ ഫലസ്തീനിയാണ് അസ്സം.
കഴിഞ്ഞ ദിവസം മൂന്ന് പേര്‍ ഇസ്‌റാഈല്‍ വെടിവയ്പില്‍ കൊല്ലപ്പെട്ടിരുന്നു. ഇതോടെ കഴിഞ്ഞ മാര്‍ച്ച് 30ന് ആരംഭിച്ച പ്രക്ഷോഭത്തിന്നിടെ കൊല്ലപ്പെട്ട ഫലസ്തീനികളുടെ എണ്ണം 46 ആയി. 5,500 പേര്‍ക്ക് പരുക്കേറ്റു.
ഹമാസിന്റെ നേതൃത്വത്തില്‍ നടത്തുന്ന പ്രക്ഷോഭത്തെയാണ് ഇസ്‌റാഈല്‍ സൈന്യം വെടിവയ്പിലൂടെ നേരിടുന്നത്. അതിനിടെ നാളെ നടക്കുന്ന ഫലസ്തീന്‍ ലിബറേഷന്‍ ഓര്‍ഗനൈസേഷന്‍ (പി.എല്‍.ഒ) യോഗത്തില്‍ ഇസ്‌റാഈലിന്റെ അംഗീകാരം റദ്ദാക്കുന്നത് ഉള്‍പ്പെടെയുള്ള കാര്യങ്ങള്‍ ചര്‍ച്ച ചെയ്‌തേക്കും. റാമല്ലയില്‍വച്ചാണ് യോഗം ചേരുന്നത്.