പൂനെ: ഡല്‍ഹിക്ക് പിന്നാലെ മുംബൈ ഇന്ത്യന്‍സും തുടര്‍ തോല്‍വിയില്‍ നിന്ന് കരകയറി. ചെന്നൈ സൂപ്പര്‍ കിങ്‌സിനെ അവര്‍ എട്ട് വിക്കറ്റിന് പരാജയപ്പെടുത്തി രണ്ടാം ജയം സ്വന്തമാക്കി. ആദ്യം ബാറ്റ് ചെയ്ത ചെന്നൈ നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തില്‍ 169 റണ്‍സ് നേടി. മുംബൈ 19.4 ഓവറില്‍ രണ്ട് വിക്കറ്റ് നഷ്ടത്തില്‍ 170 റണ്‍സെടുത്താണ് വിജയം പിടിച്ചത്.
പുറത്താകാതെ 33 പന്തില്‍ ആറ് ഫോറും രണ്ട് സിക്‌സും സഹിതം 56 റണ്‍സെടുത്ത ക്യാപ്റ്റന്‍ രോഹിത് ശര്‍മയുടെ ബാറ്റിങാണ് മുംബൈയെ വിജയ വഴിയില്‍ എത്തിച്ചത്. സൂര്യകുമാര്‍ യാദവ് (44), എവിന്‍ ലൂയിസ് (47) എന്നിവരും മികച്ച ബാറ്റിങ് പുറത്തെടുത്തു.
ടോസ് നേടി മുംബൈ ബൗളിങ് തിരഞ്ഞെടുത്തു. മിന്നും ഫോമിലുള്ള അമ്പാട്ടി റായിഡു മികവ് തുടര്‍ന്നപ്പോള്‍ ഒരറ്റം ഭദ്രമായി. എന്നാല്‍ 12 റണ്‍സുമായി സഹ ഓപണര്‍ ഷെയ്ന്‍ വാട്‌സന്‍ പുറത്തായി. മൂന്നാമനായി ക്രീസിലെത്തിയ സുരേഷ് റെയ്‌ന റായിഡുവിനൊപ്പം മികച്ച പോരാട്ടം കാഴ്ചവച്ചതോടെ ചെന്നൈ ട്രാക്കിലായി. ഇരുവരും ചേര്‍ന്ന് സ്‌കോര്‍ മുന്നോട്ട് നയിച്ചു. 11.2 ഓവറില്‍ 97 റണ്‍സിലെത്തി നില്‍ക്കേ റായിഡു മടങ്ങി. താരം 35 പന്തില്‍ രണ്ട് ഫോറും നാല് സിക്‌സും സഹിതം 46 റണ്‍സ് കണ്ടെത്തി. റെയ്‌നയ്ക്ക് കൂട്ടായി എത്തിയ ധോണിയും മികവ് പുലര്‍ത്തി. ധോണി 21 പന്തില്‍ മൂന്ന് ഫോറും ഒരു സിക്‌സും സഹിതം 26 റണ്‍സെടുത്ത് പുറത്തായി. പിന്നാലെ ഡ്വെയ്ന്‍ ബ്രാവോ ഗോള്‍ഡന്‍ ഡക്കും തൊട്ടുപിന്നിലെത്തിയ സാം ബില്ലിങ്‌സ് മൂന്ന് റണ്‍സുമായും മടങ്ങി. ഇന്നിങ്‌സ് അവസാനിക്കുമ്പോള്‍ റെയ്‌ന അപരാജിതനായി നിലകൊണ്ടു. റെയ്‌ന 47 പന്തുകള്‍ നേരിട്ട് ആറ് ഫോറും നാല് സിക്‌സും സഹിതം 75 റണ്‍സ് അടിച്ചുകൂട്ടി.
മുംബൈ നിരയില്‍ മക്ക്ലനാഗന്‍, ക്രുണല്‍ പാണ്ഡ്യ എന്നിവര്‍ രണ്ട് വീതം വിക്കറ്റുകളെടുത്തു. ഹര്‍ദിക് പാണ്ഡ്യ ഒരു വിക്കറ്റെടുത്തു.