കരുനാഗപ്പള്ളി: കാറില്‍ സ്പിരിറ്റ് കടത്തിയ യുവാവിനെ കരുനാഗപ്പള്ളി എക്‌സൈസ് പിടികൂടി. തൃശൂര്‍ ഊരകം എട്ടു മന പടിഞ്ഞാറേ സെന്റര്‍ദേശത്ത് കടുങ്ങാട്ട്പറമ്പില്‍ വീട്ടില്‍ ഷിഹാബുദ്ധീ(34)നാണ് പിടിയിലായത്. 495 ലിറ്റര്‍ സ്പിരിറ്റാണ് ഇയാള്‍ കടത്തിയത്. കാറിലും ഡിക്കിയിലുമായി 35 ലിറ്റര്‍ കൊള്ളുന്ന 15 കന്നാസില്‍ ആണ് സ്പിരിറ്റ് സൂക്ഷിച്ചിരുന്നത്. ഓച്ചിറയില്‍ നടത്തിയ വാഹന പരിശോധനക്കിടെയാണ് ഇയാള്‍ പിടിയിലായത്. കരുനാഗപ്പള്ളി റെയ്ഞ്ച് സര്‍ക്കിള്‍ ഇന്‍സ്‌പെക്ടര്‍ എസ്.അജിദാസ്, ഇന്‍സ്‌പെക്ടര്‍ എം.ഹാഷിം എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.