ഇസ്താംബൂള്‍: തുര്‍ക്കിയിലെ മധ്യ ഇസ്താംബൂളില്‍ പൊലിസിനെ ലക്ഷ്യംവച്ചുള്ള ഭീകരാക്രമണത്തില്‍ 11 പേര്‍ കൊല്ലപ്പെട്ടു. ഇതില്‍ ഏഴുപേര്‍ പൊലിസ് സേനാംഗങ്ങളും നാലുപേര്‍ സ്വദേശികളുമാണ്.
സ്‌ഫോടനത്തതില്‍ 36 പേര്‍ക്ക് പരുക്കേറ്റതായും മൂന്നു പേരുടെ നിലഗുരുതരമാണെന്നും ഇസ്താംബൂള്‍ ഗവര്‍ണര്‍ വസിപ് സഹിന്‍ പറഞ്ഞു. മെട്രോസ്റ്റേഷനും ടൂറിസ്റ്റ് കേന്ദ്രവുമായ സുലൈമാനിയ്യ മസ്ജിദിനു സമീപത്തായാണ് സ്‌ഫോടനമുണ്ടായത്. ഭീകരാക്രമണങ്ങള്‍ പതിവായ തുര്‍ക്കിയില്‍ റമദാനിലെ സ്‌ഫോടനം രാജ്യത്തെ ഭീതിയിലാക്കിയിട്ടുണ്ട്.
രണ്ടു സ്‌ഫോടനങ്ങളാണ് നടന്നതെന്നും പൊലിസ് ബസിനു സമീപത്തെ വിദൂരനിയന്ത്രിത കാര്‍ബോംബ് പൊട്ടിത്തെറിക്കുകയായിരുന്നുവെന്നും ഫ്രീലാന്‍സ് മാധ്യമപ്രവര്‍ത്തകന്‍ പറഞ്ഞു.
 ഇസ്താംബൂളിലെ ബെയ്‌സിത് ജില്ലയിലേക്ക് പോകുകയായിരുന്ന ബസിനു നേരെയാണ് ആക്രമണമെന്ന് ദേശീയ വാര്‍ത്താ ഏജന്‍സിയായ ടി.ആര്‍.ടി ന്യൂസ് റിപ്പോര്‍ട്ട് ചെയ്തു. സ്‌ഫോടന സ്ഥലവും പരുക്കേറ്റവരെ പ്രവേശിപ്പിച്ച ആശുപത്രിയും തുര്‍ക്കി പ്രസിഡന്റ് റജബ് ത്വയിബ് ഉര്‍ദുഗാന്‍ സന്ദര്‍ശിച്ചു. മാപ്പുനല്‍കാനാകാത്ത ദ്രോഹമാണിതെന്നും തീവ്രവാദത്തെ അമര്‍ച്ചചെയ്യുമെന്നും അദ്ദേഹം പറഞ്ഞു. തുര്‍ക്കിയില്‍ ടൂറിസ്റ്റ് മേഖലകള്‍ കേന്ദ്രീകരിച്ച് ഈവര്‍ഷം രണ്ട് സ്‌ഫോടനങ്ങള്‍ നടന്നിരുന്നു. രണ്ടു ആക്രമണങ്ങളും ഐ.എസ് ആണ് നടത്തിയതെന്നാണ് സംശയിച്ചിരുന്നത്. അങ്കാറയില്‍ തുര്‍ക്കി വിമതരായ കുര്‍ദുകളും ആക്രമണം നടത്തിയിരുന്നു.