നിലമ്പൂര്‍: മോഷ്ടിച്ച കാറുമായി കമിതാക്കള്‍ അടക്കം മൂന്ന് പേര്‍ അറസ്റ്റില്‍. എറണാകുളം പുല്ലേപ്പടി ചേനക്കരക്കുന്നേല്‍ നിപുന്‍(29), കോഴിക്കോട് കൂടരഞ്ഞി സ്വദേശി കുളമ്പില്‍ സ്വാലിഹ്(28), മാവേലിക്കര കൊറ്റേര്‍കാവ് സ്വദേശിനി ബി.ഐ പാലസ് ഫ്‌ളാറ്റ് എട്ടിലെ മിഖാ സൂസന്‍ മാണി (26) എന്നിവരെയാണ് നിലമ്പൂര്‍ എസ്.ഐ കെ.എം സന്തോഷും സംഘവും അറസ്റ്റ് ചെയ്തത്. ബംഗളൂരുവില്‍ നിന്നും മോഷ്ടിച്ച കാറുമായി കറങ്ങവേ കക്കാടംപൊയില്‍-നിലമ്പൂര്‍ റോഡില്‍ മൂലേപ്പാടത്ത് വെച്ച് അപകടത്തില്‍ പെടുകയായിരുന്നു. ഇവര്‍ സഞ്ചരിച്ചിരുന്ന കാര്‍ ടയര്‍ പൊട്ടിയതിനെ തുടര്‍ന്നാണ് പാലത്തിനു സമീപം അപകടത്തില്‍പ്പെട്ടത്.
കാറിനുള്ളില്‍ യുവതി അടക്കം മൂന്ന് പേരെ സംശയാസ്പദമായി കണ്ടതിനെ തുടര്‍ന്ന് നാട്ടുകാരാണ് പൊലിസില്‍ വിവരം അറിയിച്ചത്. തുടര്‍ന്ന് സ്ഥലത്തെത്തിയ നിലമ്പൂര്‍ എസ്.ഐയും സംഘവും ഇവരെ കസ്റ്റഡിയിലെടുത്തു. ഇതിനിടയില്‍ ഇവര്‍ സഞ്ചരിച്ചിരുന്ന സ്വിഫ്റ്റ് കാര്‍ ബംഗളൂരുവില്‍ നിന്നും മോഷ്ടിച്ചതായി പൊലിസ് കണ്ടെത്തി. തിങ്കളാഴ്ച രാത്രി എട്ടിന് മൂത്രം ഒഴിക്കാന്‍ പോകുന്നതിനിടയില്‍ പ്രധാനപ്രതിയായ നിപുന്‍ നിലമ്പൂര്‍ പൊലിസിനെ വെട്ടിച്ച് കടന്നു. ഇയാള്‍ക്കായുള്ള അന്വേഷണം ആരംഭിച്ചു. കമിതാക്കളായ നിപുനും യുവതിയും ദിവസങ്ങളോളം ഈ കാറില്‍ ചുറ്റിക്കറങ്ങി കൊണ്ടിരിക്കുകയായിരുന്നു. ബി.എസ്.സി നഴ്‌സിംഗ് പാസായ യുവതി സമ്പന്ന കുടുംബത്തിലെ അംഗമാണ്. ഇവര്‍ ബംഗളൂരുവില്‍ ജോലി ചെയ്തുവരികയാണ്. നിപുന്റെ സുഹൃത്താണ് സ്വാലിഹ്. നിപുന് കാര്‍ കച്ചവടവുമുണ്ട്. ഇവര്‍ സഞ്ചരിച്ച കാര്‍ കസ്റ്റഡിയിലെടുത്തിട്ടുണ്ട്. പ്രതികളെ കോടതിയില്‍ ഹാജരാക്കി.