ഓര്‍ലാന്‍ഡോ: ശതാബ്ദി കോപ്പ അമേരിക്കയില്‍ ഗ്രൂപ്പ് ബിയിലെ രണ്ടാം മത്സരത്തില്‍ ബ്രസീലിന് തകര്‍പ്പന്‍ ജയം. ഹെയ്തിയെ ഒന്നിനെതിരെ ഏഴു ഗോളുകള്‍ക്കാണ് ബ്രസീല്‍ നിലം പരിശാക്കിയത്. ജയത്തോടെ ബ്രസീലിന്റെ ക്വാര്‍ട്ടര്‍ പ്രതീക്ഷ നിലനിര്‍ത്താനായി. ബ്രസീലിനു വേണ്ടി ഫിലിപ്പ് കുടീഞ്ഞോ ഹാട്രിക് നേടിയപ്പോള്‍ റെനാറ്റോ അഗസ്‌റ്റോ രണ്ടു ഗോള്‍ വലയിലാക്കി. ഗബ്രിയേല്‍, ലുക്കാസ് ലിമ എന്നിവര്‍ ഓരോ ഗോള്‍ വീതം നേടിയപ്പോള്‍ ഹെയ്തിയുടെ വല നിറഞ്ഞു കവിഞ്ഞു.

ഹെയ്തിയുടെ ജെയിംസ് മാര്‍സിലോയുടെ ഗോളാണ് ഗോള്‍ മഴക്കിടയില്‍ ഹെയതിക്ക് ആശ്വാസമായത്. കോപ്പയിലെ ബ്രസീലിന്റെ ആദ്യ മത്സരത്തില്‍ ഇക്വഡോറുമായി ഗോള്‍രഹിത സമനിലയിലായ ബ്രസീലിന്റെ തിരിച്ചു വരവ് കൂടിയായിരുന്നു ഇന്ന്. ആദ്യ മത്സരത്തില്‍ നിരാശരായ ബ്രസീല്‍ ആരാധകര്‍ക്ക് ആവേശത്തിന് വക നല്‍കുന്നതായിരുന്നു ഇന്നത്തെ മത്സരം. അടുത്ത മത്സരത്തില്‍ പെറുവിനെതിരെ ജയിച്ചു കയറിയാല്‍ ബ്രസീലിന് എളുപ്പം ക്വാര്‍ട്ടറില്‍ പ്രവേശിക്കാം.