തൃക്കരിപ്പൂര്‍: വിനോദ സഞ്ചാര മേഖലയുടെ സമഗ്ര വികസനത്തിനായി വലിയപറമ്പ് പഞ്ചായത്തില്‍ മാതൃക വിനോദ സഞ്ചാര പദ്ധതി വരുന്നു. കുടുംബശ്രീ സംരംഭങ്ങളെ പരിപോഷിപ്പിക്കുക, പ്രദേശവാസികളെ വിനോദ സഞ്ചാര പദ്ധതിയുമായി ബന്ധിപ്പിക്കുക എന്നിവയാണ് പദ്ധതിയുടെ ലക്ഷ്യം.
സംസ്ഥാനത്ത് ഈ പദ്ധതി നടപ്പിലാക്കുന്ന 13 പഞ്ചായത്തുകളില്‍ ജില്ലയിലെ ഏക പഞ്ചായത്താണ് വലിയപറമ്പ്. പൊതുജന പങ്കാളിത്തത്തോടെയുള്ള ഉത്തരവാദിത്ത വിനോദ സഞ്ചാര വികസന പദ്ധതിയാണ് ഇത്. പദ്ധതി നടപ്പിലാക്കുന്നതിന്റെ ഭാഗമായി പഞ്ചായത്തില്‍ നടന്ന വിനോദ സഞ്ചാര ഗ്രാമസഭയുടെയുടെ ഉദ്ഘാടനവും മാതൃക ഉത്തവാദിത്ത വിനോദ സഞ്ചാര ഗ്രാമത്തിന്റെ പ്രഖ്യപനവും എം. രാജഗോപാലന്‍ എം.എല്‍.എ നിര്‍വഹിച്ചു. പഞ്ചായത്ത് പ്രസിഡന്റ് എം.ടി അബ്ദുല്‍ ജബ്ബാര്‍ അധ്യക്ഷനായി. ഉത്തരവാദിത്ത വിനോദ സഞ്ചാര മിഷന്‍ ഡെസ്റ്റിനേഷന്‍ കോഡിനേറ്റര്‍ ടി. ധന്യ, പഞ്ചായത്തംഗങ്ങളായ കെ. പുഷ്പ, എം.കെ.എം അബ്ദുല്‍ ഖാദര്‍, കെ.കെ മുഹമ്മദ് കുഞ്ഞി, കെ മാധവന്‍, വി.കെ കരുണാകരന്‍ സംസാരിച്ചു. ജില്ലാ ടൂറിസം പ്രൊമോഷന്‍ കൗണ്‍സില്‍ സെക്രട്ടറി ബിജു രാഘവന്‍ വിഷയം അവതരിപ്പിച്ചു. എം. അനില്‍ കുമാര്‍, പി. സോന, വി. രഞ്ജിത എന്നിവര്‍ ക്ലാസെടുത്തു.