ഒറ്റപ്പാലം: ഗ്രാമപ്രദേശങ്ങളിലെ ജനങ്ങള്‍ ഏറെ ആശ്രയിക്കുന്ന പ്രാഥമിക ആരോഗ്യ കേന്ദ്രങ്ങളുടെ സേവനങ്ങള്‍ കൂടുതല്‍ മെച്ചപ്പെടുത്തുമെന്ന് ആരോഗ്യമന്ത്രി കെ.കെ ശൈലജ. ഒറ്റപ്പാലം താലൂക്ക് ആശുപത്രിയിലെ വിപുലീകരിച്ച ഡയാലിസിസ് യൂനിറ്റ് ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. ഒറ്റപ്പാലം താലൂക്ക് ആശുപത്രിക്കായി മികച്ച മാസ്റ്റര്‍ പ്ലാന്‍ തയ്യാറാക്കാനും മന്ത്രി നിര്‍ദ്ദേശം നല്‍കി. താലൂക്ക് ആശുപത്രിയിലെ ഒഴിവുള്ള തസ്തികകള്‍ നികത്തുമെന്നും മന്ത്രി പറഞ്ഞു.
എം.ബി രാജേഷ് എംപി അധ്യക്ഷനായി. 2013ല്‍ എം.പി ഫണ്ടില്‍നിന്നും 75 ലക്ഷം രൂപ അനുവദിച്ചാണ് ഒറ്റപ്പാലം താലൂക്ക് ആശുപത്രിയില്‍ ഡയാലിസിസ് യൂനിറ്റ് പ്രവര്‍ത്തനം തുടങ്ങിയത്. ഒറ്റപ്പാലം നഗരസഭയുടെ 50 ലക്ഷം രൂപയും, സംസ്ഥാനസര്‍ക്കാരിന്റെ കിഫ്ബി പദ്ധതിയിലൂടെ 121 ലക്ഷം രൂപയും അനുവദിച്ചാണ് ഡയാലിസിസ് യൂനിറ്റ് വിപുലീകരിച്ചത്. ഒറ്റപ്പാലം താലൂക്ക് ആശുപത്രിയില്‍ ഒരുദിവസം 76 രോഗികള്‍ക്ക് ഡയാലിസിസ് ചെയ്യാനുള്ള സൗകര്യം ഇതോടെ ലഭിക്കും.
സാധാരണക്കാര്‍ക്ക് ഏറെ ആശ്വാസം നല്‍കുന്ന സര്‍ക്കാര്‍ ആശുപത്രികളിലൊന്നായി മാറിയിരിക്കുകയാണ് ഒറ്റപ്പാലം താലൂക്ക് ആശുപത്രി. രണ്ട് നിലകളിലായാണ് 19 യന്ത്രങ്ങളാണ് സ്ഥാപിച്ചിട്ടുള്ളത്. കേരളത്തില്‍ ഏറ്റവും കൂടുതല്‍ ഡയാലിസിസ് ചെയ്യുന്ന സര്‍ക്കാര്‍ ആരോഗ്യകേന്ദ്രം ഇനി ഒറ്റപ്പാലത്തേതായി മാറി.
പി. ഉണ്ണി എം.എല്‍.എ മുഖ്യാതിഥിയായി. ഒറ്റപ്പാലം നഗരസഭാ ചെയര്‍മാന്‍ എന്‍.എം നാരായണന്‍ നമ്പൂതിരി സ്വാഗതം പറഞ്ഞു. ഡോ. രാധ, ഒറ്റപ്പാലം ബ്ലോക്ക് പഞ്ചായത്ത് പ്രസിഡന്റ് എസ്. ശിവരാമന്‍, നഗരസഭ ഡെപ്യൂട്ടി ചെയര്‍പേഴ്‌സണ്‍ കെ. രത്‌നമ്മ, ഇ പ്രഭാകരന്‍, സുജി വിജയന്‍, ബി. സുജാത, ടി. ലത, ടി.പി പ്രദീപ് കുമാര്‍, ജില്ലാ മെഡിക്കല്‍ ഓഫിസര്‍ ഡോ. റീത്ത, സി. വിജയന്‍, ജോസ് തോമസ്, കെ. ഗോപാലന്‍, പി.എം.എ ജലീല്‍, ബാബു മൊയ്തീന്‍കുട്ടി, ടി. ഇബ്രാഹിം, ഡോ. പി.ജി മനോജ് സംസാരിച്ചു.